برطانوی شاہی جو ڑا شہزادہ ولیم اور شہزادی کیٹ مڈلٹن لاہور پہنچ گئے ہیں۔

تفصیلات کے مطابق برطانوی شاہی جو ڑا لاہور پہنچ گیا ہے ، شاہی جوڑے کا استقبال وزیراعلیٰ پنجاب عثمان بزدار اور گورنر پنجاب چودھری محمد سرور نے کیا ، اس موقع پر سیکیورٹی کے سخت انتظامات کیے گئے ۔

ذرائع کے مطابق شاہی جوڑا آج لاہورمیں مختلف مقامات ،ایس اوایس ولیج ، نیشنل کرکٹ اکیڈمی، شوکت خانم اسپتال اوربادشاہی مسجد کا دورہ کرے گا۔

ائیرپورٹ سے گورنر ہاؤس سمیت بادشاہی مسجد، ایس اوایس ویلیج، نیشنل کرکٹ اکیڈمی اور شوکت خانم اسپتال تک چھ ہزار سے زائد سکیورٹی اہلکار تعینات ہیں۔

نیشنل کرکٹ اکیڈمی کے دورے پر چیئرمین پی سی بی احسان مانی ،چیف ایگزیکٹوبر طانوی شاہی جوڑے کا استقبال کریں گے جبکہ شہزاہ ولیم ، شہزادی کیٹ برٹش ہائی کمیشن کا دوستی پروگرام کرکٹ میچ بھی دیکھیں گے۔

اس کے علا وہ شہزادہ اور شہزادی بادشاہی مسجد میں مذہبی برداشت کے موضوع پرمنعقد تقریب میں بھی شریک ہوں گے، پلان کے مطابق شاہی مہمان علامہ اقبال کے مزار پر حاضری بھی دیں گے۔

شہزادہ ولیم اورشہزادی کیٹ کرکٹ تقریب میں انعامات تقسیم کریں گے جبکہ سابق کپتان وقاریونس ، اظہر علی ، شاہین شاہ آفریدی، حسن علی تقریب میں شامل ہوں گے ، شاہی جوڑا کرکٹرز کے ساتھ تبادلہ خیال بھی کرے گا جبکہ اس کے ساتھ ساتھ عروج ممتازاورثنامیر ویمن کرکٹرز کی نمائندگی کریں گی۔

شاہی جوڑے کی اپنی سیکیورٹی ان کے ساتھ چلے گی، ایلیٹ فورس شاہی قافلے کے اسکواڈ کا حصہ ہو گی۔

وزیراعلیٰ پنجاب کا کہنا ہے کہ معزز شاہی مہمانوں کو پاکستان کے دل لاہور آنے پرخوش آمدید کہتےہیں اور شہزادہ اورشہزادی کادل کی گہرائیوں سےخیرمقدم کرتےہیں، پاکستانی عوام کےدلوں میں برطانوی شاہی خاندان کیلئےبہت احترام ہے۔

وا ضح رہے کہ گذشتہ دن برطانوی شہزادہ اورکیٹ کا چترال میں شاہی استقبال کیا گیا ، شاہی مہمانوں کو روایتی چغہ، چترالی ٹوپی شال،اورشہزادی ڈیانا کے انیس سو اکیانوے کے دورے کا یادگاری البم بھی پیش کیا گیا۔

رواں ہفتےمنگل کی رات شاہی جوڑے کے اعزارمیں اسلام آبادمونومنٹ پر عشائیےکا اہتمام کیاگیا تھا، ولیم اورکیٹ نے رکشےمیں انٹری دی، شہزادے نے شیروانی اور شہزادی نے سبز رنگ کی میکسی پہن رکھی تھی،شہزادہ شہزادی نے صدر عارف علوی اور وزیراعظم عمران خان سے بھی ملاقات کی ۔