وزیراعلیٰ پنجاب سردار عثمان بزدار نے لیاقت پور میں ٹرین میں آتشزدگی کے واقعہ کی رپورٹ طلب کر لی ہے۔

تفصیلات کے مطا بق وزیراعلی پنجاب سردار عثمان بزدار نے ٹرین میں آتشزدگی کے باعث قیمتی انسانی جانوں کے ضیاع پر گہرے دکھ اور افسوس کا اظہارکرتے ہوئے جاں بحق مسافروں کے لواحقین سے دلی ہمدردی کا اظہار اورتعزیت کی۔

ذرائع کے مطا بق وزیر اعلی پنجاب نے زخمی مسافروں کو ہسپتال میں علاج معالجہ کی بہترین سہولتیں فراہم کرنے کی بھی ہدایت کی ہے۔

وزیراعلیٰ پنجاب سردار عثمان بزدار نے افسوسناک حادثے کے بارے میں انتظامیہ سے رپورٹ طلب کرتے ہوئے کہا ہے کہ انہیں افسوسناک حادثے میں مسافروں کے جاں بحق ہونے پر دلی رنج وغم ہوا ہے۔

عثمان بزدارنے مزید کہا کہ ان کی تمام تر ہمدردیاں جاں بحق ہو نے والے افراد کے لواحقین کے ساتھ ہیں، زخمی افراد کے علاج معالجے کے لیے ہدایات جاری کردی گئی ہیں۔

وا ضح رہے کہ صوبہ پنجاب کے شہر لیاقت پور کے قریب تیز گام ٹرین کی 3 بوگیوں میں آگ لگ گئی جس کے نتیجے میں اب تک 65 افراد جاں بحق اور متعدد زخمی ہوگئے ہیں۔

کراچی سے لاہور جانے والی تیز گام ٹرین کی 3 بوگیوں میں آگ لگ گئی، حادثے میں 65 افراد جان کی بازی ہار گئے جبکہ متعدد مسافروں کی حالت تشویش ناک ہے۔
ڈی سی رحیم یار خان کے مطابق آگ سلینڈر پھٹنے کے باعث لگی ، زخمیوں کو طبی امداد کے لیے احمد پور شرقیہ، بہاولپور اسپتال منتقل کیا جا رہا ہے۔

ایم ایس ڈی ایچ کیو لیاقت پور کے مطابق شدید زخمیوں کو شیخ زید اسپتال منتقل کیا گیا ہے۔

وفاقی وزیر ریلوے شیخ رشید احمدنے لیاقت پور ٹرین حادثے میں جاں بحق و زخمی ہو نے والے افراد کی مالی امداد کا اعلان کر دیا ہے۔