میئر کراچی وسیم اختر نے کہا ہے کہ کراچی پاکستان کا سب سے بڑا تجارتی حب ہے، بطور میئر میں کراچی میں سرمایہ کاری کو خوش آمدید کہوں گا۔

تفصیلات کے مطابق میئر کراچی وسیم اختر نے ڈنمارک میں منعقدہ سی۔40 عالمی میئرز کانفرنس سے خطاب کرتے ہوئے کراچی کو بین الاقوامی معیار کے مطابق جدید شہر بنانے کے عزم کا اظہارکیا۔

وسیم اخترنے کہا کہ دنیا میں تیزی سے بدلتا موسم اور ماحولیاتی تغیر ایک عالمی مسئلہ ہے جس پراجتماعی سوچ پروان چڑھانے کی ضرورت ہےاوراگر ترقی یافتہ ممالک کی یہ سوچ ہے کہ یہ ترقی پذیر ملکوں کا مسئلہ ہے تو اس سوچ کو تبدیل کرے۔

میئر کراچی نے یہ بھی کہا کہ وفاقی، صوبائی سے لے کر لوکل گورنمنٹ تک الگ الگ سیاسی حکومتیں ہونے کے باوجود سب اس پر متفق ہیں کہ ملک میں روشن خیالی اور جمہوری استحکام ہو۔

وسیم اختر کا اپنے بیان میں کہنا تھا کہ سی پیک کی وجہ سے ملک کا انفراسٹرکچر بہت بہتر ہو چکا جو بین الاقوامی سرمایہ کاری کے لئے بہترین ہے۔

میئر کراچی کا یہ بھی کہنا تھا کہ مثبت سوچ کے باعث پاکستان تیزی سے ترقی کرتا ہوا ملک بن چکا ہے اور بین الاقوامی کرکٹ میچز اس بات کی دلیل ہیں کہ ہمارے ملک میں امن امان کی صورتحال مثالی ہے۔

میئر کراچی وسیم اختر کا مزید کہنا تھا کہ ماحولیاتی تبدیلیوں سے نمٹنا اجتماعی ذمہ داری ہے، اس چیلنج سے نمٹنے کیلئے دنیا کے امیر اور ترقی یافتہ ممالک ترقی پذیر ملکوں کے ساتھ تعاون کریں گے۔