کراچی میں تیز رفتار گاڑی نے اسکول کے دو بچوں کو کچل دیا۔ حادثے میں ایک بچہ جاں بحق جبکہ دوسرا زخمی ہو گیا۔

تفصیلات کے مطابق کراچی کے پوش علاقے ڈیفنس فیز ون میں تیز رفتار گاڑی نے اسکول کے دو بچوں کو کچل دیا۔ حادثے میں ایک بچہ جاں بحق جبکہ دوسرا زخمی ہوگیا۔ بچے موٹر سائیکل پر اسکول سے گھر واپس جارہے تھے۔ حادثہ وین اور موٹرسائیکل میں ٹکر کے باعث پیش آیا۔ بچوں کی شناخت 8 سالہ حماد اور 10سالہ طحہٰ کے نام سے ہوئی ہے۔

واقعے کے بعد پولیس نے فوری کارروائی  کرتے  ہوئے  گاڑی کے ڈرائیور کو گرفتار کر لیا ہے۔

دوسری جانب گھگر پھاٹک  کے قریب گاڑی کی ٹکر سے موٹر سائیکل سوار 2 افراد جاں بحق ہوگئے۔

رواں ماہ کراچی میں پیش آنے والا یہ پہلا ٹریفک حادثہ نہیں۔ ایک ہفتہ قبل ہی سپرہائی وے کے قریب ٹرالر اور کار میں ٹکر کے نتیجے میں دو افراد جاں بحق جبکہ دو زخمی ہوگئے تھے۔ پولیس حکام کے مطابق حادثے میں جاں بحق ہونے والے افراد کراچی کے علاقے محمود آباد کے رہائشی  تھے۔

اس سے ایک روز قبل  کراچی میں ڈبل کیبن اورپک اپ سوزوکی کے درمیان تصادم کے نتیجے میں ایک لڑکی جاں بحق اور خواتین سمیت 8 افراد زخمی ہوگئے  تھے۔ حادثہ رات گئے ماڑی پورروڈ پر پیش آیا تھا  جہاں نشے میں دھت ڈرائيور نے ڈبل کيبن گاڑی سے سوزوکی کوٹکرماردی۔ حادثے کے نتیجے میں پریتی نامی خاتون موقع پرہی جاں بحق ہوگئی۔

زخمیوں میں مرد،خواتین اور بچے شامل ہیں۔ اسپتال انتظاميہ کے مطابق 3 زخميوں کی حالت تشويش ناک  تھی۔