جمیعت علمائے اسلام (جے یوآئی) ف کے آزادی مارچ سے متعلق اپوزیشن جماعتوں کی رہبرکمیٹی کا اجلاس طلب کرلیاگیا۔

ذرائع کے مطابق اجلاس رہبرکمیٹی کےکنوینئراکرم درانی کی زیرصدارت آج رات آٹھ بجےہوگا۔ جس میں آزادی مارچ کے حوالےسےتبادلہ خیال کیا جائے گا۔

ذرائع کے مطابق رہبرکمیٹی آزادی مارچ کے حوالے سے حکومت سے مذاکرات کرنے یا نہ کرنے کا فیصلہ کرے گی اورآزادی مارچ سے پہلے اپوزیشن جماعتوں کی اے پی سی بلانے پر بھی بات چیت کی جائے گی۔

ذرائع نے بتایا کہ رہبر کمیٹی کا اجلاس  جےیو آئی (ف)کے سربراہ مولانا فضل الرحمان کی ہدایت پر طلب کیا گیا ہےجس میں مذاکراتی کمیٹی کی تجاویز رہبرکمیٹی کے سامنے رکھی جائیں گی۔

ذرائع نےکہاکہ تجاویز کی روشنی میں رہبرکمیٹی جو بھی فیصلہ کرے گی اس پرعمل کیا جائے گا۔

واضح رہے کہ آزادی مارچ سے قبل جے یو آئی (ف)کے سربراہ مولانا فضل الرحمٰن کی ہدایت پر 25 ہزار سے زائد شرکاء جڑواں شہروں میں پہنچ چکے ہیں جہاں انہوں نے اپنے رشتہ داروں اور پرائیویٹ رہائش کاانتظام بھی کرلیاہے۔

دوسری جانب پنجاب میں آزادی مارچ کے قائدین اورشرکا کے خلاف ممکنہ طور پرامن وامان سبوتاژکرنےپر سیکشن 16ایم پی او کے تحت کریک ڈائون کا فیصلہ کرلیاگیا اور اس سلسلے میں فہرستیں تیار کرلی گئیں ہیں۔

ذرائع کے مطابق ایڈیشنل چیف سیکریٹری داخلہ ، ایڈیشنل آئی جی اسپیشل برانچ سمیت اعلیٰ حکام نے وزیراعلیٰ پنجاب کوبریفنگ دی ہے کہ کریک ڈائون میں قائدین اور کارکنوں پر 16ایم پی او کے تحت مقدمات درج کرکے گرفتار کیا جائیگا۔

16ایم پی او کے تحت گرفتارشدگان کو 90 روز تک حراست میں رکھنے کا اختیار ہوتا ہےجبکہ اس مدت میں 2مرتبہ توسیع کی جاسکتی ہے ۔