مرکزی ترجمان پاکستان پیپلز پارٹی سینیٹر مولابخش چانڈیو نے کہا ہے کہ خان صاحب کا ہر دن اب ملک کیلئے خطرناک ثابت ہو رہا ہے۔

تفصیلات کے مطابق مرکزی ترجمان پاکستان پیپلز پارٹی سینیٹر مولابخش چانڈیو نے اپنے ایک بیان میں کہا کہ عمران خان نے ہرادارہ تباہ کر دیا ، نہ صنعت رہی ہے نہ صحافت۔

سیکریٹری اطلاعات پی پی پی کا کہنا تھا کہ سلیکٹڈ جمہوریت نے صحافت کا گلا گھونٹ دیا ہےاور جب صحافت نہیں رہتی تو جمہوریت بھی نہیں رہ سکتی۔

  مولابخش چانڈیو کا یہ بھی کہنا تھا کہ نیوز لائن جیسے مستحکم صحافتی ادارے کے بند ھونے کی خبر تشویشناک ہے لیکن صحافت کا گلا گھونٹنے والے زیادہ دیر مسند اقتدار پر نہیں بیٹھ سکتے۔

سیکریٹری اطلاعات پی پی پی مولابخش چانڈیو کا مزید کہنا تھا کہ پابندیوں کی وجہ سے صحافتی ادارے آمریت میں بھی بند نہیں ہوئیے لیکن پابندیاں کچھ وقت کیلئے تو چل سکتی ہیں ہمیشہ کیلئے نہیں۔

 واضح رہے اس سے قبل سیکریٹری اطلاعات پی پی پی مولابخش چانڈیو نے میڈیا سے گفتگو کرتے ہوئے کہا تھا کہ عمران خان ریاستی طاقت اور جبر سے اپوزیشن کو ایوان میں اور باہر کچلنا چاہتے ہیں۔