احتساب عدالت کے باہر دوران ڈیوٹی پیپلزپارٹی کے اہم رہنما سید خورشید احمد شاہ کے ہاتھ چومنے والے پولیس افسر کومعطل کردیا گیا ہے۔

تفصیلات کےمطابق ایس ایس پی سکھرعرفان علی سموں کے مطابق احتساب عدالت کے باہر پیپلز پارٹی کے رہنما خورشید شاہ کے ہاتھ چومنے والے سب انسپکٹر شاہ نواز کو معطل کیا گیا ہے۔

دوسری جانب ڈی ایس پی سائیٹ عبدالستار پھل کو واقعہ کی شفاف انکوائری پیش کرنے کے احکامات بھی دیئے گئے ہیں۔

ایس ایس پی سکھر کا اس بارے میں کہنا ہے کہ مذکورہ سب انسپکٹر نے ڈسپلن کی خلاف ورزی کی ہے،ڈسپلن کی خلاف ورزی اور غیرذمہ دارانہ حرکت برداشت نہیں کی جائے گی۔

واضح رہےکہ معطل کردہ سب انسپکٹرآغا شاہ نواز نےگزشتہ روزخورشید شاہ کے نیب سےروانگی کےوقت ہاتھ چوما تھا۔

سکھر کی احتساب عدالت میں پیشی کے لیے جب پیپلز پارٹی رہنما سید خورشید شاہ کو لایا گیا تو ڈیوٹی پر معمور سب انسپکٹرآغا شاہنوازنےخورشید شاہ کےگاڑی سے اترتے ہی ہاتھ پربوسہ دے ڈالااورمکمل پروٹوکول میں کمرہ عدالت تک پہنچایا۔

باوردی سب انسپکٹر کی یہ حرکت کیمروں اور میڈیا کی آنکھ سے بچ نہ سکی اور منظرعام پرآ گئی جس کے باعث سکھرپولیس کو شدید تنقید کا سامنا کرنا پڑا۔