پاکستان پیپلز پارٹی کے چیئر مین بلاول بھٹو  زرداری نے ذاتی حیثیت میں مولانا فضل الرحمان کے آزادی مارچ  میں شرکت نہ کرنے کا فیصلہ کرلیا۔

ذرائع کے مطابق چیئرمین پیپلز پارٹی بلاول بھٹو زرداری  نے پارٹی قائدین کے ساتھ مشاورت کے بعد آزادی مارچ میں شرکت نہ کرنے کا حتمی فیصلہ کر لیا ہے۔

ذرائع کا کہنا ہے کہ بلاول بھٹو بذات خود آزادی مارچ یا کسی بھی جلسے میں شریک نہیں ہوں گے، مولانا فضل الرحمان کے آزادی مارچ کا سندھ میں پارٹی قائدین استقبال کریں گے۔

آزادی مارچ  کے تحت اگر سکھر میں جلسہ کیا گیا تو جلسے میں پیپلز پارٹی کی نمائندگی صوبائی قیادت  کرے گی جبکہ آزادی مارچ جہاں جہاں سے گذرے گا وہاں کی پی پی پی قیادت مارچ کا استقبال کرے گی۔

دوسری جانب بلاول بھٹو زرداری خود آزادی مارچ کے دنوں میں جنوبی پنجاب میں اپنے جلسوں سے خطاب کریں گے۔