ضلعی انتظامیہ نے آزادی مارچ کا مشروط این او سی جاری کردیا۔

اعلامیہ کے مطابق شرکاء کسی سرکاری عمارت میں داخل نہیں ہوں گے اور شرکاءتمام شرائط کی سختی سےپاسداری کریں گے۔

حکومتی مذاکراتی کمیٹی کے سربراہ پرویز خٹک نے میڈیا سے گفتگو میں کہا کہ اپوزیشن کو اجازت دےکراپنا فرض ادا کیا ہے اگر معاہدے کی خلاف ورزی کی تو انتظامیہ حرکت میں آئے گی،  امید ہے تمام مراحل اچھے ماحول میں طے ہوں گے جبکہ اکرم درانی اور دیگر اپوزیشن رہنماوں کے ساتھ رابطے میں ہوں۔

این او سی کے مطابق کسی بھی سیاسی جماعت کے بینرز یا پتلے نہیں جلائے جائیں گے جبکہ ریلی سے شہریوں کے بنیادی حقوق متاثر نہ ہوں اور ریلی کے شرکا کی اندرونی سیکورٹی کا ذمہ دار خود ریلی انتظامیہ ہو گی۔

ریلی کے شرکا کی فہرست مقامی پولیس کو ایڈوانس میں فراہم کی جائے گی، سرکاری اور نجی املاک کو کوئی نقصان نہیں پہنچایا جائے گا جبکہ کسی بھی قسم کے نقصان کی صورت میں ریلی کے منتظمین ذمہ دار ہوں گے اور منتظمین ریلی کے گرد حصار بنا کر کارکنوں کو اس حصار تک محدود کرنے کو یقینی بنائیں گے۔

ریاست، ملک اور مذہب کے خلاف کوئی نعرہ بازی نہیں ہو گی، کسی سیاسی و مذہبی جماعت کا پرچم نہیں جلایا جائے گا جبکہ آتشبازی اور اسلحہ کی نمائش پہ پابندی ہو گی اور لاؤڈ اسپیکر کا استعمال مروجہ قانون کے مطابق کیا جا سکے گا۔