وزیراعلیٰ پنجاب سردارعثمان بزدار نے کہا ہے کہ کرتار پورراہداری کا منصوبہ سکھ برادری کیلئے وزیراعظم عمران خان کا تحفہ ہے۔

تفصیلات کے مطابق وزیراعلیٰ پنجاب سردارعثمان بزدار نے اپنے ایک بیان میں کہا کہ پاکستان آنے والی سکھ کمیونٹی کو دل کی اتھاہ گہرائیوں سے خوش آمدید کہتے ہیں۔

 وزیراعلیٰ پنجاب نے کہا کہ کرتار پورراہداری منصوبے کی افتتاحی تقریب کیلئے آنیوالی سکھ کمیونٹی کوحکومت ہر طرح کی سہولتیں فراہم کررہی ہیں۔

سردارعثمان بزدار نے یہ بھی کہا کہ کرتارپورراہداری منصوبے کی تکمیل سے اس وقت بھارت میں پاکستان کا ڈنکا بج رہا ہےاور پوری دنیا کے سکھ برادری کے جذبات خوشی اور انسباط سے لبریز ہیں۔۔

سردارعثمان بزدار کا کہنا تھا کہ وزیراعظم پاکستان نے بھارت سمیت دنیا بھر میں مقیم سکھ برداری کے دل جیت لئے ہیں جبکہ پاکستان عمران خان کے اس اقدام سے امن، محبت اور خیر سگالی کے جذبات کو فروغ ملے گا۔

وزیراعلیٰ پنجاب سردارعثمان بزدار کا مزید کہنا تھا کہ اقلیتوں کے مذہبی مقامات کے تحفظ اور اپ گریڈیشن کی اس سے بڑی مثال پوری دنیا میں کوئی نہیں، بین المذاہب ہم آہنگی کے اس تاریخی اقدم سے بین الاقوامی سطح پر پاکستان کا وقار بلند ہوا ہے۔

واضح رہے اس سے قبل  دفترخارجہ کے ترجمان ڈاکٹر محمد فیصل نے ہفتہ وار بریفنگ دیتے ہوئے کہا تھا کہ باباگرونانک کے 550 ویں جنم دن کے موقع پر پاکستان نے جذبۂ خیر سگالی کے طور پر خصوصی مراعات کا اعلان کیا ہے ،ان تمام مراعات کے حوالے سے بھارتی حکومت کو آگاہ کر دیا گیا ہے ۔

ترجمان دفترخارجہ ڈاکٹر محمد فیصل نےیہ بھی کہا تھا کہ کرتارپور راہداری سے متعلق کسی قسم کی منفی سوچ نہیں چاہتے ۔

ڈاکٹر محمد فیصل نے مزید کہا کہ کرتارپور راہداری آنے والے یاتری اسی دن واپس جائیں گے ، یاتریوں کی تعداد اس وقت تک پانچ ہزار ہے مگر زیادہ لوگ بھی آئیں گے ، پاکستان کے مختلف ممالک میں سفارتخانوں نے سکھ یاتریوں کو ویزے جاری کئے ہیں ،ٹوٹل تعداد دس ہزار کے قریب ہے جبکہ  نوجوت سنگھ سدھو کو ویزا جاری کر دیا گیا ہے، امید ہے وہ تشریف لائیں گے ۔