صدر پاکستان ڈاکٹرعارف علوی نے کہا ہے کہ گلوبل وارمنگ سے پاکستان سمیت پوری دنیا متاثر ہو رہی اور  ہمیں اس چیلنچز سے نپٹنے کے لئے عالمی سطح پر اقدامات کرنا ہونگے۔

تفصیلات کے مطابق صدر پاکستان ڈاکٹرعارف علوی نے ٹھٹھہ میں زیروکاربن پوائنٹ مکلی میں ھیریٹج فاؤنڈیشن پاکستان کی سر سبز پائیدار فن تعمیرانٹرنیشنل کانفرنس سے خطاب کرتے ہوئے کہا کہ موسمیاتی تبدیلی سے دنیا میں آبی حیات جیسے سنگین مسائل جنم لے رہے ہیں لیکن دنیا کی بڑی طاقتیں گلوبل وارمنگ کے چیلنچ سے نپٹنے کے لئے سنجیدہ نہیں ہے۔

عارف علوی نے کہا کہ ماحولیاتی تبدیلیوں سے سیاحت سمیت مختلف شعبے متاثر ہو رہے ہیں اور پاکستان کا شماران ممالک میں ہوتا ہے جن کو موسمیاتی تبدیلیوں سے سب سے زیادہ خطرہ ہے۔

صدر پاکستان ڈاکٹرعارف علوی نے تقریب سے خطاب کرتے ہوئے کہا کہ ہم موسمیاتی تبدیلیوں سے ملکی ورثہ کو محفوظ بنانے کے لئے اقدامات کر رہے ہیں۔

صدر پاکستان کا کہنا تھا کہ حکومت کا گرین و کلین منصوبہ بھی اس کی کڑی ہے  جبکہ سر سبز شاداب پروگرام پر بھی کام ہو رہا ہے جس کا مقصد یہ ہے کہ ہم عوام کو باور کرانا چاہتے ہیں کہ عام شہری کس طرح موسمیاتی تبدیلی پر اثر انداز ہو سکتا ہے

صدر پاکستان ڈاکٹرعارف علوی کا یہ بھی کہنا تھا کہ کانفرنس کا مقصد ماحولیاتی تبدیلیوں اور ثقافتی ورثہ سے متعلق امور پر غور و خوص کرنا ہے اور اس کامیاب کانفرنس کے انعقاد پر انتظامیہ کو مبارکباد دیتا ہوں۔

اس سے قبل لاہور میں ایک تقریب سے خطاب کرتے ہوئے صدر مملکت ڈاکٹر عارف علوی کا کہنا تھا کہ پاکستانی حکومت اور عوام سیاحت کے فروغ کیلئے کوشاں ہے، میں بھی بذات خود سیاحت کا بےحد شوقین ہوں۔

انہوں نے کہا کہ پاکستان قدرتی مناظر سے مالامال ملک ہے جو سیاحوں کیلئے مکمل طور پرکھلا ہے، پاکستانی حکومت سیاحت کے فروغ کیلئے خواہاں ہے، سیاحت سے مختلف تجربات اورنئی جگہیں دیکھنے کا موقع ملتا ہے۔