وزیراعلی خیبر پختونخواہ محمود خان نے کہا ہے کہ افراد کے بجائے اداروں کو مضبوط کرنے اور مخصوص حلقوں کی بجائے پورے صوبے کی ترقی کے لئے کوشاں ہیں۔

تفصیلات کے مطابق وزیراعلی خیبر پختونخواہ محمود خان نے جنوبی اضلاح کے انصاف اسٹوڈنٹ فیڈریشن سے خطاب کرتے ہوئے کہا کہ پسماندہ اور ترقی سے محروم اضلاع پر خصوصی توجہ دی جارہی ہے جبکہ پاکستان تحریک انصاف کا ویژن ، پالیسی اور منشور دیگر روایتی سیاسی جماعتوں سے یکسرمختلف ہے۔

وزیراعلی خیبر پختونخواہ نے کہا کہ عمران خان کے نظرئیے کے تحت عملی سیاست کر رہے ہیں  جبکہ تحریک انصاف وہ واحد جماعت ہے جس کا نعرہ دوسری سیاسی جماعتوں سے مکمل مختلف ہے۔

محمود خان نے یہ بھی کہا کہ پشاورسے ڈی آئی خان ایکسپریس وے کی تعمیرجنوبی اضلاع کی ترقی کے لئے انقلابی اقدام ثابت ہوگا جبکہ چشمہ رائٹ بینک کینال منصوبے کی تکمیل سے جنوبی اضلاع میں شعبہ زراعت کی ترقی کو مزید فروغ ملے گا۔

 وزیراعلی خیبر پختونخواہ کا کہنا تھا کہ طلباء کو درپیش مشکلات سے آگاہ ہیں، ہم میرٹ پر یقین رکھتے ہیں میرٹ سے ہٹ کر کوئی بھی اقدام اٹھانا ہماری پالیسی میں شامل نہیں ہے۔

محمود خان کا یہ بھی کہنا تھا کہ تعلیمی اداروں کے مسائل ترجیحی بنیادوں پر حل کئے جارہے ہیں جبکہ کالجز میں اساتذہ اور دیگر سہولیات کی فراہمی کے حوالے سے پندرہ دن کے اندر اندر متعلقہ حکام سے رپورٹ بھی طلب کرلی ہیں، رپورٹ کی روشنی میں تمام کالجز میں سٹاف اور دیگر سہولیات کی فراہمی یقینی بنائی جائے گی۔

تقریب سے خطاب کرتے ہوئے محمود خان نے کہا کہ انصاف سٹوڈنٹس فیڈریشن کی قدروقیمت کا اندازہ ہے،نوجوانوں کی محنت اور لگن سے ہی تحریک انصاف کو دوسری دفعہ خیبرپختونخوا میں اقتدار ملا ہے۔

وزیراعلی خیبر پختونخواہ محمود خان نے مزید کہا کہ کرک،کوہاٹ اور ہنگو سمیت تمام جنوبی اضلاع کے عوام کو درپیش مسائل کے خاتمے کے لئے میگا منصوبے شروع کئے جائیں گے جبکہ ایریا ڈویلپمنٹ پروگرام کے تحت ہنگو، کرک اور کوہاٹ میں چھوٹی سکیموں کی بجائے میگا پراجیکٹ کی تکمیل یقینی بنائی جائےگی۔