تنخواہوں میں اضافہ نہ کیے جانے پر بلدیہ عظمیٰ کراچی کے ملازمین  نے انوکھا احتجاج کیا۔

تفصیلات کے مطابق تنخواہوں میں اضافہ نہ  ہونے پر بلدیہ عظمیٰ کراچی کے ملازمین کے صبر کا پیمانہ لبریز ہوگیا۔ ملازمین نے انوکھا احتجاج  کرتے ہوئے کے ایم سی ہیڈ آفس کے سامنے کچرے کے انبار لگا دیے۔

کچرے کے باعث کے ایم سی ہیڈ آفس میں گاڑیوں کا داخلہ معطل ہوکر رہ گیا ہے جبکہ شہر کی معروف ترین ایم اے جناح روڈ پر ٹریفک روانی بھی بری طرح متاثر ہورہی ہے۔

واضح رہے کہ کے ایم سی  ملازمین  کی جانب سے تنخواہوں میں رواں مالی سال کے بجٹ میں اعلان کردہ 15فیصد اضافہ نہ ہونے پرگذشتہ کئی روز سے احتجاج جاری ہے۔شنوائی نہ ہونے پر احتجاج کرنے والے ملازمین نے اولڈ کے ایم سی بلڈنگ کے چاروں داخلی راستے کچرے سے بھر دیے۔

دو ماہ قبل میئر کراچی وسیم اختر نے کہا تھا کہ سندھ گورنمنٹ کی جانب سے 2019-20 ء کے بجٹ میں ملازمین کی تنخواہوں میں 15 فیصد اضافہ کو اگر بلدیہ  عظمیٰ اپنے ذرائع سے ادا کرے تو شارٹ فال میں مزید اضافہ ہوجائے گا ۔

انہوں نے کہا کہ اس اضافی رقم کی عدم فراہمی اور نامساعد حالات کے باعث بلدیہ عظمیٰ کراچی اپنے ملازمین کو یہ اضافی تنخواہ دینے سے قاصر ہے ۔