سینئر ڈائریکٹر لینڈ اینٹی اینکروچمنٹ بشیر صدیقی کی زیر نگرانی ڈسٹرکٹ ساوتھ نے نشتر روڈ گارڈن میں تجاوزات کے خلاف ایک بار پھر آپریشن شروع ہوگیا۔

تفصیلات کے مطابق ڈسٹرک ساوتھ نشتر روڈ گارڈن میں موجود تمام دوکانوں کے آگے بڑھائے گئے چبوترے دیواریں گرل مسمار کردئیے گئےجبکہ کھانے پینے کے اسٹال ریڑھیاں تخت کرسیاں میزیں پنجرے پتھارے کیبن پنکچر لگانے والوں کا سامان ضبط کر لئے گئے۔

ذرائع کا کہنا تھا کہ تجاوزات کے خلاف کاروائی ڈپٹی ڈائریکٹر آصف جیٹھا علاقہ پولیس اور اسٹاف اینٹی اینکروچمنٹ نے کی۔

واضح رہے اس سے قبل بھی کراچی میں تجاوزات کے خلاف آپریشن کے دوران سپریم کورٹ کے احکامات پر کے ایم سی کی متعدد علاقوں میں کارروائی کی گئی تھی۔

کراچی کے ایم سی کے انسداد تجاوزات عملے کی جانب سے ڈسٹرکٹ ساوتھ کاروائی میں لائٹ ہاوس، کھارادر، زینب مارکیٹ، لانڈھی، صدر اور ریگل چوک کے اطراف کے حصے شامل تھے۔

کاروائی کے دوران لائٹ ہاوس نالے کے اطراف غیر قانونی دکانیں اور جھونپڑیاں مسمار کردی گئیں جن کی تعداد 280 تھی۔ لائٹ ہاوس میں مزید کاروائی کرتے ہوئے لیڈی ڈیفرین ہسپتال کی دیوار کے ساتھ قائم 70 دکانیں بھی مسمار کی گئیں جبکہ کھارادر میں کاروائی کرتے ہوئے بخاری مسجد کے قریب فٹ پاتھ پر قائم کمرا مسمار کردیا گیا تھا۔

علاوہ ازیں صدر زینب مارکیٹ میں کاروائی کرتے ہوئے فٹ پاتھ پر قائم ٹریفک پولیس کی چوکی بھی مسمار کردی گئی جبکہ صدر کے علاقے میں مزید کاروائی کرتے ہوئے پوسٹ آفس کے سامنے سے پتھارے، ٹھیلے اور اسٹالز کا بھی صفایا کردیا گیا۔ صدر ریگل چوک پر دکانوں کے اضافی حصے بھی مسمار کر دیئے گئے تھے۔