وزیراعظم آفس میں وزیراعظم عمران خان سے وزیراعلیٰ پنجاب عثمان بزدار کی اہم ملاقات ہوئی۔

تفصیلات کے مطابق وزیراعظم آفس میں ہونے والی اس ملاقات میں پنجاب حکومت کی کارکردگی اورانتظامی معاملات پرگفتگو کی گئی جبکہ پنجاب کی سیاسی صورتحال پر بھی غور ہوا۔

اس موقع پر وزیراعظم عمران خان نے عثمان بزدار کو ہدایت کی ہے کہ مہنگائی پر قابو پانے کیلئے اقدامات کئے جائیں۔

واضح رہے کہ وزیر اعلیٰ پنجاب کی وزیراعظم سے دو دن میں یہ دوسری ملاقات ہے، وزیراعظم عمران خان نے گزشتہ روز کور کمیٹی کے اجلاس میں پنجاب میں انتظامی اصلاحات سے متعلق اہم فیصلوں کی ہدایت کی تھی۔

ملاقات میں صوبے میں انتظامی تبدیلیوں کا معاملہ زیر غور آیا تھااور  عمران خان نے پنجاب میں انتظامی تبدیلیاںلانے کا فیصلہ بھی کیا تھا۔

اس موقع پر وزیراعظم نے ہدایت کرتے ہوئے کہا کہ صوبے میں انتظامی امور کو بہتر بنایا جائے جبکہ اشیائے خوردونوش کی قیمتوں میں اضافہ نہ ہواور عوام کو زیادہ سے زیادہ ریلیف فراہم کیا جائے۔

وزیراعظم سے ملاقات سے قبل وزیراعلیٰ عثمان بزدار نے اپنے ایک بیان میں کہا ہے کہ اپوزیشن کی اے پی سی مسترد سیاستدانوں کی کانفرنس ہے۔ سیاسی بےروزگار یاد رکھیں پذیرائی عوامی خدمت سے ملتی ہے۔ عثمان بزدار نے کہا اپوزیشن جماعتوں کے پاس فلاح عامہ کا کوئی ایجنڈا نہیں۔ مسترد شدہ عناصر کے ہاتھ پہلے کچھ آیا ہے نہ آئندہ آئے گا۔

واضح رہے اس سے قبل وزیراعلیٰ پنجاب سردار عثمان بزدار سے مختلف اضلاع سے تعلق رکھنے والے اراکین پنجاب اسمبلی کی ملاقات ہوئی تھی۔

وزیراعلیٰ پنجاب سردار عثمان بزدار نے کہا تھا کہ وزیراعظم عمران خان کا ”کرپشن فری پاکستان“ قوم کے دل کی آواز بن چکا ہے۔

وزیراعلیٰ پنجاب عثمان بزدار نے یہ بھی کہا تھا کہ ارکان اسمبلی پنجاب کو مثالی صوبہ بنانے کے مشن میں میرے دست و بازو ہیں، سابق دور میں ملک کوقرضوں کے چنگل میں جکڑنے والے کس منہ سے رہنمائی کادعویٰ کرسکتے ہیں۔