منڈی بہاؤالدین کی عدالت نے 2008 سے زیر التوا ء تیزاب گردی کے سنگین نوعیت کے مقدمہ کا فیصلہ سنا دیا گیا، ملزم کو30 سال قید اور جرمانے کی سزا سنادی۔

تفصیلات کے مطابق منڈی بہاؤالدین کی عدالت کے ایڈیشنل سیشن جج محمد ممتاز ڈوگر نے ملزم اظہر شاہ کو جرم ثابت ہونے پر 30 سال قید بامشقت اور 32 لاکھ روپے جرمانہ کی سزا سنائی ہے ، جرمانے کی عدم ادائیگی پر مزید دس سال قید بھگتنا ہوگی۔

تیزاب گردی کے مجرم کسی رعایت کے مستحق نہیں، چیف جسٹس

یہ مقدمہ تھانہ صدر کے علاقے کا مشہور ترین مقدمہ تھا ۔ استغاثہ کے مطابق آج سے 11 سال قبل ملزم اظہر شاہ ساکن چک بساوہ نے اپنی رشتے دار لڑکی سمعیہ کو زیادتی کا نشانہ بنانے کے بعد اس پر تیزاب پھینک کر جھلسا دیا تھا۔

پولیس تھانہ صدر نے ملزم اظہر شاہ کے خلاف زیر دفعہ 376، 336، اور 365 ب کے تحت مقدمہ درج کرکے ملزم کو گرفتار کرلیا تھا۔

ایڈیشنل سیشن جج محمد ممتاز ڈوگر کی عدالت میں مقدمے کی سماعت کی گئی اور ملزم کو گواہوں کے بیانات کی روشنی میں مقدمے کا فیصلہ سناتے ہوئے انتہائی سخت سزائیں سنائیں۔