سرکاری سرپرستی میں چلنے والے ادارے ریڈیو پاکستان کے ملازمین بھی تنخواہوں سے محروم ہیں۔

تفصیلات کے مطابق ریڈیو پاکستان میں کنٹریکٹ ملازمین کو دو ماہ سے تنخواہیں نہیں مل سکی ہیں۔تنخواہیں  نہ ملنے پر ملازمین شدید پریشانی سے دو چار ہیں۔

تنخواہ کی عدم فراہمی پر ریڈیو پاکستان لاہور کا نائب قاصد عمران سردار احتجاج کرتے ہوئے  موت و حیات کی کشمکش میں پہنچ گیا۔

کنٹریکٹ ملازم عمران سردار سخت بیمار تھا اور اپنی تنخواہ کے حصول کے لئے  ریڈیو پاکستان آیا تھا۔ افسران کی منت سماجت کے بعد ناامید ہوکر احتجاج کرنے لگا۔

واضح رہے کہ گذشتہ روز تنخواہوں میں اضافہ نہ کیے جانے پر بلدیہ عظمیٰ کراچی کے ملازمین   کی جانب سے بھی انوکھا احتجاج کیا گیا تھا۔

تنخواہوں میں اضافہ نہ  ہونے پر بلدیہ عظمیٰ کراچی کے ملازمین نے انوکھا احتجاج  کرتے ہوئے کے ایم سی ہیڈ آفس کے سامنے کچرے کے انبار لگا دیے تھے۔

کچرے کے باعث کے ایم سی ہیڈ آفس میں گاڑیوں کا داخلہ معطل ہوکر رہ گیا  تھا جبکہ شہر کی معروف ترین ایم اے جناح روڈ پر ٹریفک روانی بھی بری طرح متاثر ہوئی تھی۔