پاکستان پیپلزپارٹی کے چیئرمین بلاول بھٹو زرداری نے طلبہ مارچ کے منتظمین کے خلاف ایف آئی آر کے اندراج کی مذمت کرتے ہوئے کہا کہ پرامن مارچ کے طلبہ کے خلاف مقدمے کا اندراج ریاستی جبر ہے۔

 اپنے بیان میں پاکستان پیپلزپارٹی کے چیئرمین نے کہا کہ ریاست مشال خان کے والد کو انصاف نہ دے سکی اور اب ان کے خلاف بھی مقدمہ درج کرلیا۔

بلاول بھٹو نے یہ بھی کہا کہ پنجاب حکومت فوری طور پر طلبہ مارچ کے منتظمین کے خلاف درج ایف آئی آر کو واپس لیا جائے۔

پاکستان پیپلزپارٹی کے چیئرمین بلاول بھٹو زرداری نے مزید کہا کہ طلبہ کے مارچ سے رجعت پسند قوتیں بوکھلا گئی ہیں، ترقی پسند طلبہ پاکستان کا مستقبل ہیں اور ہم ان کے تحفظ پر سمجھوتہ نہیں کریں گے

یاد رہے اس سے قبل بھی پیپلزپارٹی کے چیئرمین بلاول بھٹو زرداری نے ٹوئٹر پر اپنے پیغام میں کہا تھا کہ پیپلز پارٹی نے ہمیشہ اسٹوڈنٹس یونینوں کی حمایت کی ہے لیکن معاشرے کو غیر سیاسی بنانے کیلئے یونینز پر پھر پابندی لگا دی گئی ہے۔

بلاول بھٹو کا کہنا تھا کہ  کہنا تھا کہ آج یونینز کی بحالی اور تعلیم کے حق کیلئے طلبہ یکیجہتی مارچ کر رہے ہیں اور طلبہ جنسی حراسانی کے خلاف قانون سازی کیلئے اور ہائوسنگ کے حق اور کیمپسز کی ڈی ملٹرائزیشن کا مطالبہ مارچ کر رہے ہیں۔

پاکستان پیپلزپارٹی کے چیئرمین بلاول بھٹو زرداری کا مزید کہنا تھا کہ اپنے حقوق کیلئے نئی نسل کا متحرک ہونا اور پرامن جدوجہد حوصلہ افزا ہے۔

واضح رہے کہ طلبہ تنظیموں نے ملک بھر میں اسٹوڈنٹ یونینز کی بحالی کی تحریک شروع کر دی ہے۔

اس سلسلے میں مختلف شہروں میں طلبہ یک جہتی مارچ نکالے گئے، لاہور میں گورنمنٹ کالج یونی ورسٹی کی انتظامیہ نے طلبہ کو مارچ میں شرکت سے روکنے کے لیے کالج کے گیٹ کو تالے لگا دیے تھے۔