وزیراعلیٰ پنجاب سردارعثمان بزدار کی ہدایت پر وزیراعلیٰ آفس میں صوبائی ٹاسک فورس برائے انسداد پولیو کا اجلاس ہوا۔

اجلاس میں دسمبر سے اپریل تک پنجاب میں انسداد پولیو کی 3 خصوصی مہم چلانے اور مہم کی کامیابی کیلئے منتخب نمائندوں کو بھی شامل کرنے کا فیصلہ کیا گیا ہے۔

وزیراعلیٰ آفس میں ہونیوالے اجلاس میں مستقبل کی حکمت عملی کا جائزہ لیا گیا جبکہ  اجلاس کو بتایا گیاکہ اضلاع میں انسداد پولیو مہم کی مقامی سطح پر موثرمانیٹرنگ ہوگی جبکہ  ڈپٹی کمشنر ہر ضلع میں مانیٹرنگ کیلئے خصوصی ٹیمیں تشکیل دیں گے اور  انسداد پولیو مہم میں نمایاں شخصیات عملی طورپر حصہ لیں گے ۔

چیف سیکرٹری نے کہا کہ مہم کےاہداف کے حصول کا باقاعدہ آڈٹ کیا جائےگا، زمینی حقائق کے مطابق ڈیٹا مرتب کیا جائے اور پرائیویٹ اسکولوں میں زیر تعلیم بچوں کو بھی انسداد پولیو کے قطرے پلانے کا پابند بنایا جائے۔

چیف سیکرٹری نے  یہ بھی کہا کہ پنجاب میں دوسرے شہروں سے آنے والے خاندانوں کے بچوں کو بھی پولیو کے قطرے لازمی پلائے جائیں۔

 صوبائی سیکرٹری پرائمری وسکینڈری ہیلتھ کیپٹن (ر) محمد عثمان کا کہنا تھا  کہ پنجاب میں انسداد پولیو مہم میں ایک لاکھ 13 ہزار سے زائد افراد حصہ لیں گے۔

صوبائی سیکرٹری پرائمری و سکینڈری ہیلتھ کیپٹن(ر)محمد عثمان  نے یہ  بھی کہا کہ  کسی شخص کو بچوں کو انسدادپولیو کے قطرے نہ پلانے سے انکار کرنے کا اختیار نہیں اور ایک محلے میں خاندان ویکسینیشن سے انکارکریں   تو سارے محلے کے بچے رسک کی زد میں آجاتے ہیں اسلئے ہائی رسک یونین کونسلز پر خصوصی توجہ دے رہے ہیں۔

اجلاس میں صوبائی وزراء مراد راس، فیاض الحسن چوہان، چیف سیکرٹری پنجاب، متعلقہ محکموں کے سیکرٹریز، ڈبلیو ایچ او، بل گیٹس فانڈیشن، یونیسف، روٹری انٹرنیشنل کے نمائندوں اور اعلیٰ حکام نے شرکت کی۔