کمانڈر رائل بحرین نیول فورس ریئر ایڈمرل محمد یوسف العاصم نے نیول ہیڈ کوارٹرز اسلام آباد کا دورہ کیا اور پاک بحریہ کے سربراہ امیر البحر ایڈمرل ظفر محمود عباسی سے ملاقات کی۔

ترجمان پاک بحریہ کے مطابق نیول ہیڈکوارٹرز آمد پر ایڈمرل ظفر محمود عباسی نے معزز مہمان کا استقبال کیا۔ معزز مہمان کو روایتی انداز میں گارڈ آ ف آنر پیش کیا گیا اور معزز مہمان کا پرنسپل اسٹاف آفیسرز سے تعارف کرایا گیا۔

کمانڈر رائل بحرین نیول فورس نے پاک بحریہ کے سربراہ سے ملاقات کی، ملاقات کے دوران باہمی دلچسپی کے امور بشمول دونوں ملکوں کی بحری افواج کے مابین تعاون کو مزید فروغ دینے پر تبادلہ خیال کیا گیا۔

سربراہ پاک بحریہ نے خطے میں سمندری سلامتی اور امن کو یقینی بنانےاور دہشت گردی کے خلاف جنگ میں پاکستان کے کردار پر روشنی ڈالی۔ بعدازاں معزز مہمان کو بریفنگ دی گئی اور مقبوضہ کشمیر میں جاری بھارتی جارحیت پر پاکستانی موقف سے آگاہ کیا گیا۔ معزز مہمان نے خطے میں بحری سیکیورٹی اور استحکام کے حوالے سے پاکستان بحریہ کی کاوشوں کو سراہا۔ کمانڈر رائل بحرین نیول فورس کے دورے سے دونوں ممالک بالخصوص بحری افواج کے مابین دوطرفہ تعاون کو مزید فروغ ملے گا۔

واضح رہے کہ اس سے قبل ترکی کے مسلح افواج کے کمانڈر جنرل یاسر گلر نے پاکستان کے دورے پر پاک فضائیہ اور پاک بحریہ کے ہیڈ کوارٹرز کا دورہ کیا اور سربراہان سے ملاقاتیں کیں۔

ترجمان پاک بحریہ کے مطابق ترک مسلح افواج کے کمانڈر جنرل یاسر گلر کے نیول ہیڈ کوارٹرز دورہ پر قائم مقام نیول چیف وائس ایڈمرل فیاض جیلانی نے ترک کمانڈر کا استقبال کیا اور ترک مسلح افواج کے کمانڈر کی آمد پر انہیں روایتی گارڈ آف آنر پیش کیا گیا۔

اس موقع پر ترک کمانڈر نے وائس ایڈمرل فیاض جیلانی سے خصوصی ملاقات کی ، جس میں باہمی دلچسپی اور دفاعی امور پر بات چیت کی گئی جبکہ ترک کمانڈر کو کشمیر پر پاکستان کے اصولی مؤقف سے بھی آگاہ کیا گیا۔

ترجمان پاک بحریہ نے کہا کہ معزز مہمان نے نیول ہیڈ کوارٹرز میں یادگار شہدا پر پھول چڑھائے اور ان کا پرنسپل اسٹاف آفیسرز سے بھی تعارف کروایا گیا۔