ڈی جی رینجرز سندھ میجر جنرل عمر احمد بخاری نے اندرون سندھ کشمور میں کچے کےعلاقے کا دورہ کیا اور کچے کے علاقے میں تعینات افسروں اور جوانوں سے ملاقات کی۔

ترجمان رینجرز کے مطابق دورہ میں سیکٹر کمانڈر شہباز رینجرز نے ڈی جی رینجرز سندھ کو علاقے کی مجموعی صورتحال پر تفصیلی بریفنگ دی۔

اس موقع پر ڈی جی رینجرز سندھ میجر جنرل عمراحمد بخاری نےکچے میں تعینات افسروں اور جوانوں کے جذبوں کی تعریف کی اور صحت و تعلیمی منصوبوں کے حوالے سے کام کرنے والے افراد کی خدمات کو بھی سراہا۔

ڈی جی رینجرز سندھ کا کہنا تھا کہ رینجرز کے جوان ارض ِوطن کے دفاع کی خاطر اپنی خدمات سر انجام دے رہے ہیں۔

ڈی جی سندھ رینجرز میجر جنرل عمراحمد بخاری کا مزید کہنا تھا کہ رینجرز سندھ کی جانب سے کچے کے علاقے کے رہائشیوں کو مزید سہولیات پہنچانے کے لیے اپنے اقدامات جاری رکھے جائیں گے۔

واضح  رہے کہ اس سے قبل ترجمان رینجرز کے مطابق ڈی جی رینجرز سندھ میجر جنرل عمر احمد بخاری نے بن قاسم ایسوسی ایشن آف ٹریڈ انڈسٹری کا دورہ کیا تھا۔

دورے میں انڈسٹری کے ممبران نے ڈی جی رینجرز سندھ سے ملاقات کی اور انڈسٹریز کے اغراض و مقاصد اور کارکردگی کے حوالے سے آگاہ کیا تھا۔

ڈی جی رینجرز عمر احمد بخاری نے کہا تھا کہ معاشی ترقی پُرامن حالات سے مشروط ہے۔

عمر احمد بخاری نے یہ بھی کہا تھا کہ رینجرز سندھ اور دیگر قانون نافذ کرنے والے ادارے تاجروں کا اعتماد بحال کرنے اور امن وامان کی صورتحال کو مزید بہترکرنے کے لیے اقدامات کر رہے ہیں جبکہ کراچی میں قائم ہونے والے امن میں قانون نافذ کرنے والے اداروں کے ساتھ ساتھ عوام بالخصوص تاجروں کا تعاون کلیدی حیثیت رکھتا ہے۔

 ڈی جی رینجرزعمر احمد بخاری نے مزید کہا تھا کہ بن قاسم ایسوسی ایشن کے ممبران نے رینجرز کی جانب سے شہر میں امن کی بحالی اور تاجر برادری کے لیے کیے گئے سیکیورٹی انتظامات پر اظہار تشکر کیا۔