کراچی میں وزیراعلیٰ سندھ کی جانب سے ڈبل سواری پر پابندی ختم کردی گئی ہے۔

کمشنر کراچی کے مطابق وزیر اعلیٰ سندھ کی ہدایت پر ڈبل سواری پر پابندی ختم کی جارہی ہے تاہم اسلحہ کی نمائش، آتش گیر مواد رکھنے اور ون ویلنگ پر پابندی جاری رہے گی۔ کمشنر کراچی کا کہنا ہے کہ شہری نئے سال کا جشن ذمہ داری کے ساتھ اور مہذب انداز میں منائیں۔

وزیراعلیٰ سندھ مراد علی شاہ نے عوام کو نئے سال کی مبارکباد دی اورسی ویو پر کنٹینر لگانے سے انتظامیہ کو سختی سے منع کیا، وزیراعلیٰ سندھ نے کمشنر کرا چی اور پولیس چیف کو ہدایت دیتے ہوئے کہا کہ عوام کو کسی طریقے سے بھی تنگ نہیں کیا جائے، یہ شہر آپ کا ہے اس کی خوبصورتی اور صفائی ستھرائی کا خیال رکھنا ہم سب کی ذمہ داری ہے۔

کراچی میں دفعہ 144 عائد

وزیراعلیٰ سندھ نے کہا کہ عوام سے اپیل ہے کہ اسلحہ اور نشہ آور اشیاء کا استعمال نہیں کیا جائے، کسی سے بھی بدتمیزی کرنا ناقابل برداشت ہوگا، یہ سی ویو آپ کا ہے عزت، محبت اور قانون کے احترام سے نئے سال کی خوشیاں منائیں، امید ہے کہ 2020 سندھ کی خوشحالی کا سال ثابت ہوگا۔

واضح رہے کہ اس سے قبل کراچمین نیو ایئر کے موقع پر سندھ حکومت کی جانب سے دفعہ 144 نافذ کی گئی تھی جس کا اطلاق کل رات 12 بجے سے ہوگیا تھا تاہم اب وزیراعلیٰ سندھ کے احکامات کے مطابق ڈبل سواری پر پابندی ختم کردی گئی ہے۔

پولیس نے 31 دسمبر کی رات ہلہ گلہ کرنے والے منچلوں اور سڑکوں پر بغیر سلنسر موٹرسائیکل چلانے والوں کے خلاف حکمت عملی تیار کر لی ہے۔

پولیس نے کسی بھی ناخوشگوار واقعے سے نٹمنے کے لیے عوامی مقامات پر اضافی اہلکاروں کی ڈیوٹیاں لگائی ہیں اور جگہ جگہ اسنیپ چیکنگ بھی شروع کر دی ہے۔

دوسری جانب اسلام آباد پولیس نے بھی نیو ائیر نائٹ کے لیے سیکیورٹی پلان جاری کردیا ہے۔

ترجمان اسلام آباد پولیس کے مطابق  ون ویلنگ، بغیر سائلنسر موٹرسائیکل چلانے اور  بغیر نمبر پلیٹ گاڑیوں اور موٹر سائیکلوں کے خلاف بھی کارروائی ہوگی۔