وفاقی کابینہ کے اجلاس میں ‏آئی جی سندھ کی تعیناتی کا ایجنڈا  موخر کرکے نئے آئی جی سندھ کے لیے مزید نام طلب کر لیے گئے۔

اسلام آباد میں  وزیر اعظم عمران خان کی زیر صدارت وفاقی کابینہ  کا اجلاس ہوا   جس میں آئی جی سندھ کی  تعیناتی کی منظوری  موخر کرکے معاملہ گورنر اور وزیر اعلیٰ سندھ کے سپرد کردیا گیا۔

کابینہ اجلاس میں فیصلہ کیا گیا کہ گورنر اور وزیر اعلیٰ مل بیٹھ کر آئی جی سندھ کا معاملہ حل کریں۔

کابینہ اجلاس کے بعد وفاقی وزیر مراد سعید کے ہمراہ میڈیا سے گفتگو کرتے ہوئے معاون خصوصی برائے اطلاعات   ڈاکٹر  فردوس عاشق اعوان  نے کا کہنا تھا کہ آئی جی سندھ کی تعیناتی پر سندھ سے تعلق رکھنے والے اتحادیوں نے اعتراض کیا ہے۔

فردوس عاشق اعوان نے بتایا کہ آئی جی سندھ کے لیے نئے نام طلب کرلیے گئے ہیں اور  اس حوالے سے گورنر سندھ کو وزیراعلیٰ سندھ سے مشاورت کا ٹاسک دیا گیا ہے۔

وزیراعظم سے وزیراعلیٰ کی ملاقات، آئی جی سندھ کی تبدیلی پر اتفاق

معاون خصوصی برائے اطلاعات نے کہا کہ ‏آئی جی سندھ  کے لیے ایسانام دینے کا کہا ہے جس پر تمام فریقین کا اتفاق ہو۔

انہوں نے مزید کہا کہ کابینہ اجلاس میں  ‏آٹے کے بحران کےحوالے سے  بھی بات ہوئی  جس پر وزیراعظم  عمران خان نےناجائزمنافع خوروں  سے آہنی ہاتھوں سےنمٹنے  کے عزم  کو دہرایا۔

فردوس عاشق اعوان نے بتایا کہ ‏اجلاس میں  آٹے کا بحران پیدا کرنے والے مافیا  کے خلاف فیکٹ فائنڈنگ کمیٹی بنائی گئی ہے۔‏فیکٹ فائنڈنگ کمیٹی میں ہرممکن حدتک جانے کا فیصلہ  ہوا ہے۔

اس موقع پر مراد سعید کا کہنا تھا کہ کیمپ آفسز کے قیام کو روکنے  کے لیے قوانین میں ترامیم کی گئی  ہیں۔

انہوں نے بتایا کہ ‏وزیراعظم نےکہا  ہے کہ وہ کیمپ آفس میں نہیں  رہیں گے۔ ماضی کی حکومتوں نے ملک کو قرضوں کی دلدل میں دھکیلا ہے۔

وفاقی وزیر کا مزید کہنا تھا کہ سابق وزیر اعظم یوسف رضا گیلانی نے ملتان اور لاہور میں  5کیمپ آفس  بنا رکھے تھے۔شریف برادران کے  بھی سی ایم آفس سمیت 5کیمپ  آفس تھے۔