وزیر خارجہ شاہ محمود قریشی نے کہا ہے کہ پاکستان نہ تو کسی ملک کے خلاف اپنی سرزمین استعمال کرنے دے گا اور نہ ہی کسی علاقائی تنازعہ کا حصہ بنے گا۔

تفصیلات کے مطابق  وزیر خارجہ شاہ محمود قریشی نے سینٹ میں مشرق وسطیٰ کی صورتحال پر پالیسی بیان دیتے ہوئے کہا کہ پاکستان کسی یکطرفہ کارروائی کی حمایت نہیں کرتا کیونکہ طاقت کا استعمال کسی مسئلے کاحل نہیں ہے۔

اس موقع پر وزیر خارجہ نے ایران سمیت اپنے علاقائی منصبوں سے بات کی ہے اور خطے میں کسی تنازع سے بچنے کے لئے ممکنہ صبروتحمل سے کام لینے پر زور دیا۔

شاہ محمود قریشی  نے کہا کہ نئی جنگ سے علاقائی ملکوں پر بد ترین اثرات مرتب ہوسکتے ہیں، پاکستان مصالحت امن اور استحکام میں کردارادا کرسکتاہے لیکن خطے میں جنگ کی آگ کو ہوا نہیں دے گا۔

وزیر خارجہ نے عراق میں امریکی حملے میں ایرانی کمانڈر کی ہلاکت کے حالیہ واقعے کے اثرات پر تحفظات کا اظہار کرتے ہوئے کہا کہ اس سے خطے خصوصاً عراق اور شام میں عدم استحکام کے امکانات مزید بڑھ گئے ہیں۔

شاہ محمود قریشی  کا کہنا تھا  کہ بھارت خطے میں بڑھتی ہوئی کشیدگی کو مقبوضہ کشمیر میں انسانی حقوق کی خلاف ورزیوں اور ملک بھر میں قانون شہریت کے خلاف مظاہروںسے توجہ ہٹانے کیلئے استعمال کرسکتاہے۔

سعودی عرب کی ایران اور امریکا سے پرسکون رہنے کی درخواست

اپنے بیان میں شاہ محمود قریشی  نے عالمی برادری ‘ اقوام متحدہ اور دیگر بین الاقوامی اداروں پر زور دیا کہ وہ خطے میں کسی بھی تنازعے سے بچنے کیلئے اپناکردار اداکریں۔

وزیر خارجہ شاہ محمود قریشی نے  مزید کہا کہ اس سے افغانستان میں امن عمل بھی بری طرح متاثر ہوگا اور یمن کے حوثی باغی سعودی عرب پر جبکہ حزب اللہ اسرائیل پر راکٹ حملے تیز کرسکتے ہیں۔

واضح رہے کہ 3 جنوری کو عراق کے دارالحکومت بغداد میں ایئرپورٹ کے نزدیک امریکی فضائی حملے میں پاسداران انقلاب کی قدس فورس کے سربراہ میجر جنرل قاسم سلیمانی جاں بحق ہوگئے تھے۔

قاسم سلیمانی کے ہلاکت کے بعد ایران کے سپریم لیڈر آیت اللہ خامنہ ای نے امریکا سے شدید انتقام لینے کا اعلان کرتے ہوئے قاسم سلیمانی کو مزاحمت کا عالمی چہرہ قرار دیا تھا اور ملک میں 3روزہ سوگ کا اعلان کیا تھا۔