دفتر خارجہ کی ترجمان عائشہ فاروقی نے کہا ہے کہ پاکستان نے سلامتی کونسل اور جنرل اسمبلی کی قراردادوں کے مطابق دو ریاستی حل کی ہمیشہ حمایت کی ہے۔

دفترخارجہ سے جاری بیان کے مطابق ترجمان عائشہ فاروقی نے کہا ہے کہ امریکہ کی جانب سے مشرق وسطی کیلئے امن منصوبہ کے اعلان کا ہم نے جائزہ لیا ہے۔

انہوں نے کہا ہے کہ پاکستان نے سلامتی کونسل اور جنرل اسمبلی کی قراردادوں کے مطابق دو ریاستی حل کی ہمیشہ حمایت کی ہے اور پاکستان مذاکرات اور بات چیت کے ذریعے فلسطین کے مسئلے کے منصفانہ اور پائیدار حل کی حمایت کرتا ہے جس سے استصواب رائے سمیت فلسطینیوں کے جائز حقوق کی فراہمی یقینی ہو۔

ترجمان دفتر خارجہ نے مزید کہا کہ ہم یہ مطالبہ پھر دہراتے ہیں کہ بین الاقوامی معیار اور 1967ء سے قبل کی سرحدات کے مطابق قابل عمل، خودمختار اور ملحق سرحدیں رکھنے والی فلسطینی ریاست قائم کی جائے جس کا دارالحکومت القدس الشریف ہو۔