وزیرخارجہ شاہ محمود قریشی نے کہا ہے کہ وزیر اعظم نے مسئلہ کشمیر کو اجاگر کرنے کے لیے 25 جنوری سے کشمیر آگاہی مہم شروع کرنے کا فیصلہ کیا ہے۔

تفصیلات کے مطابق  اسلام آباد میں وزیر خارجہ مخدوم شاہ محمود قریشی نے وفاقی وزیر کمیونیکیشن مراد سعید، معاون خصوصی برائے اطلاعات ڈاکٹر فردوس عاشق اعوان اور سینیٹر فیصل جاوید کے ہمراہ مشترکہ پریس کانفرنس کرتے ہوئے کہا کہ مقبوضہ کشمیر کی خصوصی حیثیت ختم کیے جانے کے بھارتی اقدام کی وجہ سے علاقائی امن و سلامتی خطر ے میں ہے۔

شاہ محمود قریشی  نے کہا کہ آج 175 روز سے لاک ڈاون جاری ہے ، مقبوضہ کشمیر میں کوئی ایسا بنیادی انسانی حق نہیں جس کو صلب نہ کیا گیا ہو۔

وزیرخارجہ نے یہ بھی کہا کہ 80 لاکھ سے زاید کشمیری عملی اور نفسیاتی طور پر قیدی ہیں اور  ان حالات میں وزیراعظم عمران خان کی رایے ہیں کہ خطے کے امن کو داو پر لگایا جا رہا ہے اس وجہ سے ہم نے کوشیش کی کہ مسئلے کو ایک مرتبہ پھر سلامتی کونسل میں کے جایا جائے۔

شاہ محمود قریشی نے کہا کہ  مسئلہ کشمیرکی افادیت اور اہمیت سے کوئی انکاری نہیں، بھارت کے 5 اگست کے اقدامات سے پوری دنیا باخبر ہے ۔

شاہ محمود قریشی نے یہ بھی کہا کہ مسئلہ کشمیر 16 اگست کو بھارت کی تمام رکاوٹوں کے باوجود معاملہ سلامتی کونسل میں اٹھایا گیا  جبکہ 12   دسمبر کو وزیراعظم کی ہدایت پر ایک اور خط سلامتی کونسل کے صدر اور جنرل اسمبلی صدر کو بھجوایا اور 17 جنوری کو چین کی امداد سے معاملے کو دوبارہ سلامتی کونسل میں اٹھایا گیا ۔

وزیر خارجہ نے کہا کہ مسئلہ کشمیر سے متعلق اقوام متحدہ کی 2 رپورٹس موجود ہیں، یورپی یونین میں بھی مسئلہ کشمیر پر بحث ہوئی، یو ایس کونسل کے سامنے اس وقت2 قرارداد جمع کرائی جا چکی ہیں، مسئلہ کشمیر سے متعلق امریکی منتخب نمائندوں پرعوام کا دباؤ ہے جبکہ اب  وزیراعظم نے  بھی ڈونلڈ ٹرمپ سے کہہ دیا آپ خاموش نہ رہیں، امریکا کشمیر کے معاملے پر خاموش رہا تو دنیا نقصان اٹھائے گی ۔

شاہ محمود قریشی کا کہنا تھا کہ امریکی صدرفوری طور پر بھارت کو فالس فلیگ آپریشن سے روک سکتے ہیں، امریکی صدر بھارت کو باور کرا سکتے ہیں کہ اگر ایسا کیا تو پاکستان جواب دے گا، ہم نے ماضی میں بھارت کو فالس فلیگ آپریشن پر بھرپور جواب بھی دیا۔

مقبوضہ کشمیرمیں کرفیوکا171واں روز،سوشل میڈیاپرتحریک

وزیرخارجہ نے کہا  کہ  پاکستان اور وزیر اعظم کی بڑی واضح ہالیسی ہے کہ ہم اس مسلے کو سیاسی، اخلاقی اور سفارتی طور پر اٹھاتے رہیں گے جب تک کہ کشمیریوں کو ان کا حق حاصل نہیں ہو جاتا

شاہ محمود قریشی کا کہنا تھا کہ  اب وزیر اعظم نے اس مسلے کو دوبارہ منظم انداز میں اٹھانے اور باقایدہ مہم چلانے کا اعلان کیا ہے ،25 جنوری سے مسئلہ کشمیر سے متعلق باقاعدہ مہم شروع کی جائے گی۔

شاہ محمود قریشی  کا یہ بھی کہنا تھا کہ کشمیر آگاہی مہم  کے دوران مسئلہ کشمیر کو اجاگر کیا جائے گا اور مقدمہ عوام کے سامنے رکھیں گے جبکہ 27 جنوری کو کلچرل شو ہوگا جس میں مسئلہ کشمیر پر فوکس کیا جائے گا ۔

وزیرخارجہ شاہ محمود قریشی کا مزید کہنا تھا کہ 28  جنوری کو پورے پاکستان میں تصویری نمائشیں ہوں گی، تصویری نمائشوں میں کشمیریوں کے حالت زار سے متعلق آگاہ کیا جائے گا۔