باجوڑ میں مکان کی چھت گرنے سے 7 بچے ملبے تلے دب کر جاں بحق ہوگئے جبکہ 5 زخمی بھی ہوئے ہیں۔

تفصیلات کے مطابق رپورٹ کے مطابق جس وقت حادثہ پیش آیا گھر کے تمام بچے سردی سے بچنے کے لیے ایک ہی کمرے میں موجود تھے۔

میتیں اور زخمی ڈسٹرکٹ ہیڈ کوارٹراسپتال خار لائے گئے جہاں والدین صدمے سے نڈھال ہیں، زخمی ہونے والے 5 بچوں میں سے بعض کی حالت تشویشناک بتائی جاتی ہے۔

باجوڑ اورگردونواح میں مسلسل بارش کے باعث تحصیل نواگئی میں بھی کمرے کی چھت گرگئی جس سےخاتون زخمی ہوگئی۔

اس سے قبل بلوچستان میں شدید برف باری سے مکان کی چھت گر گئی، چھت گرنے ایک ہی خاندان کے 6 افراد جاں بحق ہوگئے تھے۔

ژوب کے علاقے شہاب زئی میں برفباری کے باعث مکان کی چھت گرنے سے  ایک ہی خاندان کے 6 افراد ملبے تلے دب کر  جاں بحق ہوگئے۔

لیویز حکام کا کہنا تھا کہ جاں بحق ہونے والوں میں 3 خواتین اور 3 بچے شامل ہیں اور تمام افراد کی لاشیں نکال لی گئیں جبکہ ، لاشوں کو سول ہسپتال ژوب منتقل کیا جارہا ہے ۔