ابو ظہبی کے ولی عہد و متحدہ عرب امارات کی مسلح افواج کے ڈپٹی سپریم کمانڈر شیخ محمد بن زید النہیان 2 جنوری کو پاکستان کے ایک روزہ دورے پر آ رہے ہیں۔

ڈپٹی سپریم کمانڈر شیخ محمد بن زید النہیان 2020 میں پاکستان کا دورہ کرنے والی پہلی عالمی شخصیت ہوں گے۔

انھوں نے گذشتہ سال 5 جنوری کو پاکستان کا دورہ کیا تھا جو کسی بھی عالمی رہنما کی طرف سے سال کا پہلا دورہ پاکستان تھا۔

اس روایت کو برقرار رکھتے ہوئے وہ جمعرات 2 جنوری 2020 کو اپنے دوسرے دورہ پاکستان پر اسلام آباد پہنچیں گے۔

متحدہ عرب امارات کے پاکستان میں تعینات سفیر حمد الذعابی نے اپنے بیان میں کہا کہ ولی عہد ابو ظہبی دونوں ممالک کے درمیان برادرانہ تعلقات کو مزید مظبوط کرنے آ رہے ہیں، وہ اپنے دورے میں وزیراعظم عمران خان اور دیگر اعلیٰ پاکستانی حکام سے ملاقاتیں کریں گے۔

وزیر اعظم کی سعودی ولی عہد سے ملاقات

انھوں نے کہا کہ اس دورے میں دونوں ممالک کے درمیان معاشی تعلقات میں اضافے کے سلسلے میں اقدامات کے ساتھ ساتھ باہمی دلچسپی کے علاقائی اور عالمی امور پر تبادلہ خیال ہو گا۔

پاکستان کے وزیراعظم عمران خان نے اقتدار سنبھالنے کے بعد اپنے پہلے غیر ملکی دورہ سعودی عرب سے واپسی پر ستمبر میں اور پھر نومبر 2018 میں ابوظہبی کے دو دورے کیے تھے۔ ان دوروں کے دوران دونوں ممالک کے درمیان تعلقات کو نئے سرے سے بہتر کرنے پر اتفاق کیا گیا تھا۔

ان دوروں کے دوران دونوں ملکوں نے دو طرفہ تعلقات کو طویل مدت سٹرٹیجک اور اقتصادی شراکت داری میں بدلنے اور تجارت، سرمایہ کاری اور اقتصادی ترقی کے لیے جامع لائحہ عمل پر بنانے پر اتفاق کیا۔