امیرجماعت اسلامی سینیٹرسراج الحق نے کہا ہے کہ حکمران جو وعدے کرتے ہیں ، وہ پورے نہیں ہوتے ۔

تفصیلات کے مطابق امیرجماعت اسلامی سینیٹرسراج الحق نے اپنے ایک بیان میں حکومت پر تنقید کرتے ہوئے کہا کہ حکومت نے خو د کچھ کرنے کی بجائے پورا نظام آئی ایم ایف کے کلرکوں کے حوالے کردیاہے ۔

سراج الحق نے کہا کہ وزیراعظم کہتے ہیں ان کو ملنے والی تنخواہ میں گھر کا خرچہ بھی پورا نہیں ہورہا  اور ان کا یہ بیان وزیراعظم کی طرف سے شکست کا اعتراف ہے ۔

امیرجماعت اسلامی سینیٹرنے اپنے بیان میں یہ بھی کہا کہ معیشت کا بیڑا غرق کرنے والی معاشی ٹیم کو وزیراعظم سلام پیش کررہے ہیں۔

سراج الحق کا کہنا تھا کہ کسی ملک کے وزیراعظم خود بد حال ہوں تو عام آدمی کا کیا ہوگا ، وزیراعظم بتائیں کہ جس خاندان کے آٹھ دس افراد ہیں ، وہ کیسے گزار ا کرے گا۔

امیرجماعت اسلامی سینیٹرسراج الحق کا مزید کہنا تھا کہ وزیر اعظم کا دو لاکھ میں گزار نہیں ہوتا تو پندرہ بیس ہزار روپے کمانے والے کا گزارہ  کیسے ہوسکتاہے۔

سراج الحق کا خطاب، حکمرانوں پر کڑی تنقید

واضح رہے اس سے قبل امیر جماعت اسلامی سراج الحق نے اپنے ایک بیان میں کہا تھا کہ حکمران کی بیساکھیاں ٹوٹنے والی ہیں کیونکہ ان کی تمام پالیسیاں فیل ہوگئی ہیں۔

 سراج الحق نے یہ بھی کہا تھا کہ وزیر قانون نہیں ، عمران خان کی پوری ٹیم نالائقوں کا ٹولہ ہے، ملکی تاریخ میں آئین اور اداروں کے ساتھ ایسے کھلواڑ کی مثال نہیں ملتی جو موجودہ حکومت کر رہی ہے۔

سراج الحق نے مزید کہا کہ حکومت کی نالائقی روز اول سے واضح تھی لیکن آج دن بھر کے واقعات نے ثابت کردیا ہے کہ یہ مہا نالائق ہیں۔

ینیٹرسراج الحق نے یہ بھی کہا کہ حکومت کے شہزادے مہنگائی کے توڑ کے لیے ٹماٹر کے بجائے دہی استعمال کرنے کا مشورہ دے رہے ہیں۔

امیر جماعت اسلامی کا کہنا تھا کہ اقتدار والے صرف اپنے کارخانوں شوگر ملوں اور بینک اکائونٹس میں اضافہ چاہتے ہیں لیکن جماعت اسلامی چاہتی ہے نوجوان اپنے والدین اور معاشرے کےلئے مفید شہری بن جائیں۔