پاکستان اور اسپین نے دونوں ممالک کے درمیان دفاعی تعاون میں اضافے کی ضرورت پر اتفاق کیا ہے۔

تفصیلات کے مطابق اسپین کے سفیر مسٹر مینوئل دران گیمنیز ریکوکی آج اسلام آباد میں وفاقی وزیر دفاع پرویز خٹک سے ملاقات ہوئی ہے۔

 ملاقات میں دونوں فریقین نے دونوں ممالک کے مابین دفاعی تعاون بڑھانے کی ضرورت پرزور دیا جبکہ دفاع میں تعاون بڑھانے کے ساتھ ساتھ باہمی تعلقات کے دیگر شعبوں میں تبادلہ خیال کیا گیا۔

اس موقع پر وفاقی وزیر دفاع نے کہا کہ پاکستان اسپین کے ساتھ اپنے تعلقات کی قدر کرتا ہے، پاکستان اور سپین کے درمیان دفاعی تعاون کے بارے میں مفاہمت کی ایک یادداشت منظوری کے مرحلے میں ہے۔

وفاقی وزیر دفاع پرویز خٹک نے یہ بھی کہا کہ دہشت گردی’ انتہا پسندی’ غیر قانونی ترک وطن اورمنشیات کی سمگلنگ جیسے عالمی مسائل سے نمٹنے کے لئے تعاون سپین کے ساتھ ہمارے دوطرفہ تعلقات کا اہم حصہ ہے۔

عثمان ڈار کی وزیر دفاع پرویز خٹک سے ملاقات

 ملاقات کا اختتام دونوں فریقین کے لئے نیک خواہشات کے تبادلے کے ساتھ ہوا جبکہ وزیر دفاع نے ہسپانوی فوج کو باہمی تعاون کے منصوبوں اور کثیر الجہتی سمندری مشق امان میں شامل ہونے کی  دعوت بھی دی۔

واضح رہے اس سے قبل بھی و زیراعظم کے معاون خصوصی نوجوانان عثمان ڈار کی وزیر دفاع پرویز خٹک سے ملاقات ہوئی تھی۔

 ملاقات میں محمد عثمان ڈار نے پرویز خٹک کو کامیاب جوان پروگرام ‘‘کے بارے میں بریفنگ دی  جبکہ کامیاب جوان پروگرام کے مختلف منصوبوں میں پیش رفت بارے آگاہ کیا گیاتھا ۔

وزیراعظم کے معاون خصوصی نوجوانان عثمان ڈار  نے کہا  تھاکہ نوجوانوں کی مناسب تعلیم تربیت اورپیشہ وارانہ کارکردگی کوبہتر بنانے کیلئے حکومت تمام وسائل بروئے کار لا رہی ہے۔

اس موقع پر پر  ویز خٹک نے کہا  تھاکہ نوجوان نسل پاکستان کا قیمتی اثاثہ ہے، پروگرام استعداد بڑھائے گا جبکہ خیبرپختونخوا،فاٹا اور بلوچستان کے دوردراز اورپسماندہ علاقوں کے نوجوانوں کو’’کامیاب جوان پروگرام‘‘ میں ترجیح دی جائے۔