مرکزی ترجمان پی پی پی سینیٹر مولابخش چانڈیو نے کہا ہے کہ فیصل واوڈا نے ٹاک شو میں جوتا رکھ کر مخالفین کی ہی نہیں اداروں کی بھی توہین کی ہے۔

تفصیلات کے مطابق مرکزی ترجمان پی پی پی سینیٹر مولابخش چانڈیو نے اپنے ایک بیان میں  وفاقی وزیر فیصل واوڈا  پر تبصرہ کرتے ہوئے کہا کہ پارلیمنٹ اور اداروں کی توہین کرنے والے وزیر پر ٹاک شوز میں جانے پر پابندی کافی نہیں۔

پی پی پی سینیٹر مولابخش چانڈیو نے یہ بھی کہا  کہ ایک ایسی رسم چل پڑی ہے جس میں ایسے وزرا کی زبان سے پارلیمنٹ میں کوئی محفوظ ہے نہ میڈیا پر ، حکومتی وزرا کا یہ  پہلے دن سے پارلیمنٹ میں بھی یہی رویہ رہا  ہے۔

مرکزی ترجمان پی پی پی سینیٹر مولابخش چانڈیو   نے مزید کہا کہ وزیراعظم کا فیصل واوڈا پر پابندی کا فیصلہ احسن ہے مگر انہیں حکومتی رویے پر بھی غور کرنا ہوگا۔

واضح رہے کہ اینکر پرسن کاشف عباسی کے شو ’آف دی ریکارڈ ‘ میں وفاقی وزیر برائے آبی وسائل فیصل واوڈا نے ن لیگ کوشدید تنقید کا نشانہ بنایااور دوران شو اچانک ایک کالے رنگ کا فوجی بوٹ میز پر رکھتے ہوئے کہا’میں تو اب ہر پروگرام میں یہ رکھا کروں گا، یہ آج کی جمہوری ن لیگ ہے کہ اب لیٹ کے نہیں چوم کے بوٹ کو عزت دو۔‘

منگل کی شب نشرہونے والے شو میں پیپلز پارٹی کے رہنما قمر الزمان قائرہ اور پاکستان مسلم لیگ (ن) کے رہنما جاوید عباسی موجود تھے۔

فیصل واوڈا اب کسی ٹی وی شو میں نہیں بیٹھے گے، فردوس عاشق اعوان

پروگرام کا موضوع سابق وزیراعظم نواز شریف کی صحت اور ان کی لندن میں کھینچی گئی ایک تصویر کا وائرل ہونا تھا۔

فیصل واوڈا کی اس حرکت کے بعد پروگرام کے میزبان اور فیصل واوڈا کے درمیان ایک دلچسپ مکالمہ دیکھنے میں آیا۔ کاشف عباسی نے چھوٹتے ہی کہا کہ ’میں تو سمجھا تھا یہ بندوق لے کر آئے ہیں یہ تو بندوق سے بھی زیادہ خطرناک چیز لے آئے ہیں۔‘

ساتھ ہی اینکرپرسن نے سوال کیا کہ یہ بوٹ کس کا ہے تو جواباً فیصل واوڈا نے جاوید عباسی کی جانب اشارہ کرتے ہوئے کہا ’ان سے پوچھیں۔‘

جاوید عباسی نے جواب دیا کہ ’ان کو اس سے بہتر اور کس کا پتا ہے۔‘

فیصل واوڈا اس بوٹ کی چمک کے بارے میں بار بار بات کر رہے تھے تو شو کے اینکرنے ان سے پوچھا کہ اسے کس نے چمکایا ہے۔ جس پر فیصل واوڈا نے کہا کہ ’یہ چمک انسان کے ہاتھ کی نہیں ہو سکتی، جس حد تک یہ جا چکے ہیں یہ زبان سے چمکا ہوا لگ رہا ہے۔‘