وفاقی وزیر برائے منصوبہ بندی ، ترقی و اصلاحات اور خصوصی اقدامات اسد عمر نے کہا ہے کہ وفاقی حکومت آزاد جموں وکشمیر کے ترقیاتی منصوبوں کو مکمل کرانے میں مکمل مدد فراہم کرتی رہے گی۔

 تفصیلات کے مطابق وفاقی وزیر برائے منصوبہ بندی ترقی و اصلاحات اسد عمر کی وزیراعظم آزاد جموں و کشمیر راجہ فاروق حیدر کے ساتھ ملاقات ہوئی۔

اس موقع پر وزیر اعظم آزاد جموں وکشمیر راجہ فاروق حیدر نے  آزاد جموں وکشمیر کی ترقی کے لئے وفاقی حکومت کی طرف سے دیئے گئے تعاون کی تعریف کی اور ان کا شکریہ ادا کیا  جبکہ اسد عمر نے آزاد جموں و کشمیر کی ترقی کے لئے آزاد جموں کشمیر کے وزیر اعظم کو اپنے مکمل تعاون کی یقین دہانی کرائی۔

ملاقا ت میں وفاقی وزیر برائے منصوبہ بندی اسد عمر نے کہا کہ وفاقی حکومت آزاد جموں وکشمیر کے ترقیاتی منصوبوں کو مکمل کرانے میں مکمل مدد فراہم کر رہا ہے جبکہ پبلک سیکٹر ڈویلپمنٹ پروگرام (پی ایس ڈی پی) کے تحت جاری منصوبوں پر کام کی رفتار کو بھی تیز کیا جارہا ہے۔

اسد عمر نے یہ بھی کہا کہ  حکومت کی اولین تریجیح  سیاحت کا فروغ ہےاور پاکستان کو اب سیاحت کے اعلی مقامات میں شامل کیا جارہا ہے۔

صاف پانی کی فراہمی کے لئے ہر ممکن کوشش کی جائے گی، اسد عمر

وفاقی وزیر برائے منصوبہ بندی ، ترقی و اصلاحات اور خصوصی اقدامات اسد عمر نے مزید کہا کہ سیاحت کی سہولیات کو مزید بڑھانا ضروری ہو گیا ہے ، حکومت سیاحت سے متعلق انفراسٹرکچر کی بہتری کے لئے بھر پور تعاون فراہم کرے گی۔

راجہ فاروق حیدر نے اسد عمر سے ملاقات میں کہا کہ ماضی کی نسبت آزاد جموں و کشمیر کی مالی حیثیت میں اب زیادہ بہتری آئی ہے ۔

 یاد رہے کہ مقبوضہ کشمیر میں بدترین لاک ڈاؤن جاری ہے ، کشمیری عوام تین ماہ سے زائد عرصے سے قیدیوں کی زندگی گزارنے پر مجبور ہیں۔

وادی مقبوضہ کشمیر کی سڑکیں سنسان، دکانیں بند، کاروباری مراکز پر تالے پڑے ہیں، مسلسل کرفیو کے باعث کاروبار زندگی درہم برہم، گھروں کے باہر بھی فوجی تعینات، گھروں میں محصورافراد کو اپنے رشتہ داروں کے جنازے تک پڑھنے کی بھی اجازت نہیں،اسکول بند ہیں، طبی امداد نہ ملنے سے مریضوں کی زندگیاں بھی داؤ پر لگ گئیں، ہر روز سات سے آٹھ افراد کو دل کا دورہ پڑرہا ہے لیکن علاج معالجے کی کوئی سہولت میسرنہیں۔