پاکستان میں تعینات چینی سفیر یاؤژنگ نے کہا ہے کہ پاکستان کی ترقی چین کے لیے اہم ہے،سی پیک کے خلاف اٹھنے والی آوازیں کامیاب نہیں ہوں گی۔

تفصیلات کے مطابق اکستان میں تعینات چینی سفیر یاؤژنگ نے اپنے ایک بیان میں  کہا ہے کہ سی پیک کے حوالے سے بہت منفی پروپیگنڈا ہورہا ہے مگر منصوبے کے تحت لیے گئے قرضے کی مقدار کم ہے جسے 20 سال میں واپس کرنا ہے جبکہ 60 فیصد سی پیک منصوبے مقامی کمپنیاں مکمل کریں گی۔

چینی سفیر یاؤ جنگ نے کہا کہ چین اس وقت مشکل دور سے گزر رہا ہے، کرونا وائرس کے خلاف مشکلات کا سامنا ہےجبکہ پاکستان کی طرف سے ایسے وقت میں بھرپور حمایت پر شکر گزار ہیں اور  ہمیں فخر ہے کہ عالمی برادری میں پاکستان چین کا نمبر ون دوست ہے۔

یاؤژنگ نے  یہ بھی کہا کہ ہمارے تعلقات پر کئی ممالک کی نظریں ہیں اور ہم جو مرضی کرلیں یہ ممالک ان تعلقات کو پسندیدگی کی نگاہ سے نہیں دیکھیں گے، چین اور پاکستان کو ایک دوسرے پر اعتماد ہے۔

سی پیک پاکستان کے لیے ریڑھ کی ہڈی کی حیثیت رکھتا ہے ، گورنر سندھ

پاکستان میں تعینات چینی سفیر کا کہنا تھا کہ سی پیک پاکستان اور چین کی شراکت داری کا بڑا حصہ ہے،سی پیک میں سولہ منصوبے مکمل ہوچکے ہیں جن میں موٹرویز اپگریڈیشن اور گوادر پورٹ کی تعمیر شامل ہے جبکہ سی پیک کے آئندہ مرحلے میں ریلوے اور توانائی کے اہم منصوبے شامل ہیں۔

یاؤژنگ  کا یہ بھی کہنا تھا کہ گوادر سے کوئٹہ، چمن اور پھر وسط ایشیائی ریاستوں تک ریلوے لنک اہم ہے اور یہ ریلوے لنک خطے کی تجارت کو فروغ دے گا۔

پاکستان میں تعینات چینی سفیر یاؤژنگ کا مزید کہنا تھا کہ سی پیک کے تحت سپیشل اکنامک زون بن رہے ہیں جو مشترکہ صنعتی پیداوار فراہم کریں گے جبکہ سی پیک کے تحت ووکیشنل تربیت روزگار میں اضافہ اور غربت میں کمی کرے گا۔