وزیر داخلہ اعجاز احمد شاہ  سے تر کی کے ڈپٹی وزیرداخلہ اسماعیل گاتلا کی ملاقات ہوئی ہے۔

ملاقات میں باہمی امور کے اہم معاملات زیر غور لائے گئے اور مہاجرین اور غیر قانونی طور پر مقیم افراد کے مسئلے کے متعلق بات چیت کی گئی جبکہ ملاقات میں ترکی کے سفیر مصطفیٰ احسان یرداکل بھی شریک ہوئے۔

اس موقع پر تر کی کے ڈپٹی وزیرداخلہ اسماعیل گاتلانے پاکستان کی جانب سے بھرپور تعاون پر شکریہ ادا کرتے ہوئے کہاکہ دونوں ممالک کے درمیان تعلقات کی بہتری میں وزارت داخلہ کا اہم کردارہے۔

وزیر داخلہ اعجاز احمد شاہ  نے کہا کہ ہم ترکی کی جانب سے پاکستان کی ہر فورم پر سپورٹ کے لیے شکر گزار ہیں،ترک صدر کا دورہ بھی نہایت کامیاب تھا۔

اعجاز احمد شاہ  نے  یہ بھی کہا کہ وزارت داخلہ کے ترتیب کردہ قوائد وضوابط کے تحت لوگوں کی شناخت میں آسانی ہوئی ہے، غیر قانونی سفر کی روک تھام کے لیے ایئر پورٹس پر سیکورٹی سخت ہے اور نقلی کاغذات پر سفر نہیں ہو سکتا۔

 وزیر داخلہ اعجاز احمد شاہ  نے مزید  کہا کہ ہماری ٹیم کی الیکٹرانک پاسپورٹ متعارف کروانے کی تجویز کو جلد عمل میں لایا جائے گا،امید ہے کہ تمام مسائل مکمل طور پر حل کر لیں گے۔

واضح رہے اس سے قبل وفاقی وزیر داخلہ اعجازاحمد شاہ نے میڈیا سے گفتگو کرتے ہوئے کہا  تھا کہ وزیراعظم عمران خان کی ہدایت پر 5 فروری کو پوری قوم کشمیریوں کے ساتھ بھرپور یکجہتی کا اظہار کرے گی اور بھارت کا اصل چہرہ دنیا کے سامنے بے نقاب کریں گے۔

پاکستان خطے میں امن کے لئے اقدامات کرے گا، اعجازاحمد شاہ

وفاقی وزیر داخلہ  نے کہا تھا کہ بھارتی افواج کئی دہائیوں سے کشمیریوں پر مظالم ڈھا رہی ہے اور گزشتہ 6 ماہ سے مسلسل کرفیو نے کشمیریوں کی زندگیاں اجیرن کر رکھی ہیں۔

اعجازاحمد شاہ نے یہ بھی کہا تھا کہ پاکستان خطے میں قیام امن کے لئے ہر ممکن اقدامات کرے گا، حکومت اور اتحادیوں میں کوئی اختلاف نہیں ہیں،اتحادیوں کے تمام تحفظات دور کئے جائیں گے۔

اپنے بیان میں اعجازاحمد شاہ نے مزید کہا تھا کہ حکومت نیجب اقتدار سنبھالا تو ملکی خزانہ خالی تھا،حکومتی پالیسیوں کی وجہ سے ملکی معیشت مسلسل بہتری کی طرف گامزن ہے،انشاء اللہ آنے والا وقت ترقی اور خوشحالی کا ہو گا۔