کشمیر یوتھ الائنس  کے صدر ڈاکٹر سید مجاہد گیلانی نے کہا ہے کہ بھارت سید علی گیلانی کو علاج کی مناسب سہولیات فراہم نہیں کررہا۔

تفصیلات کے مطابق کشمیر یوتھ الائنس کے صدر ڈاکٹر سید مجاہد گیلانی نے اپنے ایک بیان میں کہا کہ سید علی گیلانی شدید بیمار ہیں، گیلانی خاندان کے مرکزی گھر میں سوگ کا عالم ہے لیکن بھارتی حکام سید علی گیلانی کو علاج کی سہولیات فراہم نہیں کررہے۔

کشمیر یوتھ الائنس کے صدر نے کہا کہ سید علی گیلانی کی ساری زندگی جدوجہد سے تعبیر ہے۔ آزادی اور حق خود ارادیت کی جدوجہد میں عمر کا زیادہ حصہ بھارتی جیلوں میں گزارا ہے، جبکہ دس سال سے زائد عرصہ نظربندی میں گزارے، حالت بیماری میں بھی نظربند ہیں۔

اپنے بیان میں ڈاکٹر سید مجاہد گیلانی  نے یہ بھی کہا کہ بھارت نے حریت قائد کی آزادی کی آواز دبانے کے لیے ظلم و جبر کے تمام ہتھکنڈے آزمائے لیکن وہ ان کے عزم و حوصلے کو توڑنے میں کامیاب نہیں ہو سکا۔

صدر ڈاکٹر سید مجاہد گیلانی  کا کہنا تھا کہ رواں ماہ فروری میں ڈاکٹر قاسم کو بھی جیل میں 28 سال مکمل ہوگئے مگر وہ عزم و ہمت کا پیکر بنے ہوئے بھارتی جبر کے سامنے سیسہ پلائی ہوئی دیوار ہیں۔

حریت رہنما سید علی گیلانی کا کشمیری عوام کو خط

صدر کشمیر یوتھ الائنس ڈاکٹر سید مجاہد گیلانی نے عوام سے اپیل کی ہے کہ وہ سید علی گیلانی کیلئے خصوصی دعائیہ تقاریب کا اہتمام کریں جبکہ انہوں نے حکومت سے اپیل کی ہے کہ عالمی اداروں پر زور ڈالیں تاکہ بھارت کو مجبور کیا جائے کہ وہ سید علی گیلانی کو علاج کی سہولیات فراہم کریں، سید علی گیلانی مقبوضہ کشمیر کی عوام کیلئے امید ہیں۔

یاد رہے کہ حر یت کانفرنس کے چیئرمین سیدعلی گیلانی کی طبیعت پچھلے 6 ماہ سے خراب ہے اور انہیں حال ہی میں ایس کے آئی ایم ایس اسپتال میں داخل کرایا گیا تھا۔