وزیراعظم کی مشیر برائے اطلاعات و نشریات فردوس عاشق اعوان نے کہا ہے کہ نوازشریف کی بیماری کانام اقتدارسے دوری ہے اور اقتدار کے ساتھ جڑی بیماری لاعلاج ہے ۔

تفصیلات کے مطابق وزیراعظم کی مشیر برائے اطلاعات و نشریات فردوس عاشق اعوان  نے میڈیا سے گفتگو کرتے ہوئے کہا کہ نواز شریف کی  بیماری کا نام اقتدار سے دور بیٹھنا ہے، اقتدار کے ساتھ جڑی بیماری لاعلاج بیماری ہے جبکہ اس بیماری کا ایک ہی علاج ہے اور وہ اقتدار کا نشہ ہے۔

وزیراعظم کی مشیر برائے اطلاعات و نشریات  نے کہا کہ جب عوام ان کومستردکردیں توبیمارپڑجاتے ہیں، کونسی پراسراربیماری ہے جوبرطانوی ڈاکٹرتشخیص نہیں کرپارہے ہیں ، دعاگو ہیں میاں صاحب جلد صحت یاب ہوں۔

فردوس عاشق اعوان  نے  یہ بھی کہا کہ میاں صاحب کے ایک سہولت کار ہیں جو ملک سے فرار ہیں جبکہ اپوزیشن لیڈر کے دونوں چیمبر خالی پڑے ہیں، اس وقت ن لیگی قیادت میں قحط پڑا ہوا ہے۔

اپنے بیان میں وزیراعظم کی مشیر برائے اطلاعات و نشریات کا کہنا تھا کہ مریم بی بی بھی کہیں نظر نہیں آرہیں اور اب عوام کا درد بھی کہیں دکھائی نہیں دے رہا ہے، اصل میں وہ عوام کا درد نہیں اقتدار کا درد ہے۔

فردوس عاشق اعوان  کا یہ بھی کہنا تھا کہ آج لاہوری اپنے کھربوں روپے کا حساب مانگ رہے ہیں، تمام فنڈز میگا پروجیکٹ بنانے پر لگائے گئے مگر مثبت اثرات نظر نہیں آئے۔

رہنما رانا ثناء اللہ مجھے بچاؤ تحریک چلارہے ہیں، فردوس عاشق اعوان

وزیراعظم کی مشیر برائے اطلاعات و نشریات فردوس عاشق اعوان  کا مزید کہنا تھا کہ سینٹرل پنجاب کی تمام تنظیموں نے مینار پاکستان پر حلف اٹھایا ہے، گلے سڑے نظام سے چھٹکارے کے لیے کوششوں کے عزم کا اظہار کیا ہے، آپ نے پنجاب میں ن لیگ کے قلعے میں شگاف ڈال دیا۔