انڈونیشیا نے پاک بحریہ کے سربراہ ایڈمرل ظفرمحمود عباسی کواپنا اعلی ترین اعزاز دیا ہے۔

انھیں یہ اعزاز دونوں ملکوں کی بحریہ کے درمیان تعلقات مستحکم کرنے کیلئے ان کی خدمات کے اعتراف میں دیا گیا ہے۔

پاک بحریہ کے سربراہ نے جکارتہ کے دورے کے دوران انڈونیشیا کے نائب وزیردفاع ، بحریہ کے سربراہ اور میرین کور کے کمانڈنٹ سے ملاقاتیں بھی کیں اور دو طرفہ تعاون اور دونوں ملکوں کی بحریہ کے درمیان تعاون کو مزید وسعت دینے سے متعلق امور پر تبادلہ خیال کیا۔

پاک بحریہ کے سربراہ نے انڈونیشیا میں مختلف فوجی تنصیبات کا بھی دورہ کیا اور اس کی فوج کی پیشہ ورانہ مہارت کو سراہا۔

ترجمان پاک بحریہ کے مطابق جکارتہ میں نیول ہیڈ کوارٹرز اور میرین بریگیڈ ہیڈ کوارٹرز پہنچنے پر امیرالبحر کا شاندار استقبال کیا گیا نیول چیف کو گارڈ آف آنرز پیش کئے گئے۔

ایڈمرل ظفر محمود عباسی کو انڈونیشیا کے اعلی ترین فوجی اعزاز بنتنگ جالا سینا اوتاما سے نوازا گیا۔

ترجمان پاک بحریہ نے بتایا کہ نیول چیف نے مختلف فوجی تنصیبات کا دورہ بھی کیا اور انڈونیشین میرینز کی پیشہ وارانہ صلاحیتوں کی تعریف کی اور کہا ہے کہ نیول چیف کا یہ دورہ دونوں ملکوں بالخصوص بحری افواج کے مابین تعلقات کو مزید فروغ دے گا۔