وزیرخارجہ مخدوم شاہ محمود قریشی نے  کہا ہے کہ مقبوضہ جموں وکشمیر میں بھارت کے بڑھتے ہوئے جارحارنہ رویہ پر سخت تشویش ہے۔

 تفصیلات کے مطابق اقوام متحدہ کے سیکریٹری جنرل انتونیو گوتیرس کی دفتر خارجہ آمد  ہوئی جہاں  ان کا وزیر خارجہ مخدوم شاہ محمود قریشی نے   خیرمقدم کیا، اس موقع پر  وزیر خارجہ شاہ محمود قریشی کے ہمراہ سیکرٹری خارجہ سہیل محمود,  ڈی جی یو ای. فرخ سمیت دیگر حکام بھی شریک ہوئے۔

   ملاقات میں افغانستان میں مفاہمتی عمل, مہاجرین کی واپسی, پاکستان کی قیام امن کے لئیے کوشیشوں,مقبوضہ کشمیر کی ابتر صورتحال سمیت باہمی دلچسپی کےا مور پر تبادلہ خیال کیا گیا ۔

وزیر خارجہ نے کہا کہ عالمی امن وسلامتی پاکستان اور اقوام متحدہ کی مشترک خواہش ومقصد ہے اس لئے پاکستان اور اقوام متحدہ چار دہائیوں سے مل کر افغان مہاجرین کی مدد کررہے ہیں۔

شاہ محمود قریشی  نے یہ بھی کہا کہ پاکستانی قوم نے اپنے مصیبت زدہ افغان بھائیوں بہنوں کی کھلے دل سے مدد کی جبکہ 45لاکھ افغان مہاجرین کے لئے چار دہائیوں سے زائد عرصہ سے پاکستان دوسرا گھر ہے اور پاکستان آج بھی 27 لاکھ افغان مہاجرین کی میزبانی کا فرض ادا کررہا ہے۔

ملاقات میں وزیر خارجہ کا کہنا تھا کہ پاکستان کو اعزاز حاصل ہے کہ وہ دنیا کے 5 سب سے زیادہ فوجی دستے فراہم کرنے والے ممالک میں شامل ہے۔

 شاہ محمود قریشی  نے کہا کہ ہمیں فخر ہے کہ 78 پاکستانی خواتین اقوام متحدہ کے امن فوجی دستوں میں خدمات انجام دے رہی ہیں جبکہ جون 2019ءسے پاکستانی خواتین فوجی دستے کانگو میں اقوام متحدہ کے امن مشنز میں شریک ہیں۔

موسمیاتی تبدیلیوں کا اثر دنیا کیلئے خطرہ ہے، انتونیو گوتریس

وزیر خارجہ  نے یہ بھی کہا کہ بھارت کی جانب عام شہریوں کو شہید کیاجارہا ہے جبکہ ایل او سی پر جنگ بندی کی خلاف ورزیوں میں اضافہ ہوا ہے اور  ہم بھارت کے زیرقبضہ جموں وکشمیر میں قابض بھارتی افواج کی انسانی حقوق کی سنگین پامالیوں کی مذمت کرتے ہیں۔

شاہ محمود قریشی کا کہنا تھا کہ مقبوضہ جموں وکشمیر آج دنیا میں سب سے بڑا ملیٹرائیزڈ زون بن چکا ہے 200 دن گزرنےکے باوجود 80 لاکھ سے زائد کشمیری قیدوبند اور مواصلاتی قدغنوں کا شکار ہیں جبکہ 9 لاکھ بھارتی قابض افواج نے مقبوضہ جموں وکشمیر کا محاصرہ کیا ہوا ہے۔

شاہ محمود قریشی کا یہ بھی کہنا تھا کہ 8 اگست کو سیکریٹری جنرل کے بیان سے تنازعہ کشمیر پر اقوام متحدہ نے اپنے موقف کی توثیق کی، تنازعہ کشمیر کے حوالے سے اقوام متحدہ کو ابھی بہت کچھ کرنے کی ضرورت ہے جبکہ پاکستانی قوم اور کشمیری عوام حق خودارادیت کا وعدہ پورا ہونے کے منتظر ہیں۔

وزیر خارجہ مخدوم شاہ محمود قریشی کا مزید کہنا تھا کہ پاکستانی اور کشمیری عوام پرامید ہیں کہ اقوام متحدہ کی سلامتی کونسل ان کا قانونی، جائز اور جمہوری حق رائے دہی انہیں جلد فراہم کرے گی۔