وزیر خارجہ مخدوم شاہ محمود قریشی نے کہا ہے کہ سارک خطے کیلئے ایک اہم پلیٹ فارم ہے اور اس کو خطے کی بہتری کیلئے استعمال میں لایا جانا چاہیے۔

تفصیلات کے مطابق سارک ویڈیو کانفرنس کے حوالے سے وزیر خارجہ مخدوم شاہ محمود قریشی نے  اپنے  بیان میں کہا کہ دیکھیے بالآخر نریندر مودی اور ہندوستان کو سارک کی اہمیت کا احساس ہوا۔

شاہ محمود قریشی  نے کہا کہ پاکستان کافی عرصہ سے کوشش کر رہا تھا کہ سارک کی سمٹ لیول کے اجلاس کا انعقاد اسلام آباد میں ہو سکے لیکن بھارت اور مودی سرکار اس سلسلے میں سب سے بڑی رکاوٹ تھی۔

اپنے بیان میں وزیر خارجہ مخدوم شاہ محمود قریشی نے یہ بھی کہا کہ ہم چاہتے ہیں کہ سارک کو فعال بنایا جائے مگر اس میں بھی رکاوٹ ہندوستان بنتا رہا۔

شاہ محمود قریشی کا کہنا تھا کہ مقبوضہ جموں و کشمیر کے حوالے سے بھارتی اقدامات اور مودی سرکار کا رویہ آپ کے سامنے ہے لیکن اس کے باوجود آج جب انہوں نے کرونا کے حوالے سے سارک ویڈیو کانفرنس کی پیشکش کی تو پاکستان نے اس عالمی وبا کی نوعیت، خطے کی ضرورت اور انسانی تقاضوں کو پیش نظر رکھتے ہوئے معاون خصوصی برائے صحت ڈاکٹر ظفر مرزا کے ذریعے اس کانفرنس میں شرکت کی۔

کورونا وائرس پر سارک سربراہ ویڈیو کانفرنس

وزیر خارجہ مخدوم شاہ محمود قریشی کا مزید کہنا تھا کہ ڈاکٹر ظفر مرزا نے اس کانفرنس میں کرونا وائرس کے حوالے سے پاکستان کی طرف سے حفظ ما تقدم کے تحت کی جانے والی کوششوں اور اس وبا کی روک تھام کیلئے کئے گئے ٹھوس اقدامات سے آگاہ کیا جس کا مقصد یہ ہے کہ ہم ایک دوسرے کی اچھی روایات کی پیروی کر کے اس وبا سے چھٹکارا حاصل کر سکیں۔

یاد رہے کہ اس سے قبل بھارت نے پاکستان سے کورونا وائرس سے متعلق سارک کانفرنس میں شرکت کی درخواست کی تھی جس پر پاکستان نے وزیر مملکت کی سطح پر شرکت کی رضامندی ظاہر کی اور پاکستان کی جانب سے ڈاکٹر ظفر مرزا کانفرنس میں شریک ہوئے۔