سیکرٹری جنرل پاکستان پیپلز پارٹی سید نیر حسین بخاری نے کہا ہے کہ  مہنگائی بے روزگاری معاشی بدحالی کے زمہ داران گھر جانا پڑے گا کیونکہ 2020 حقیقی تبدیلی کا سال ہے۔

انہوں نے کہا ہے کہ ریاست مدینہکے سربراہ کے ارد گرد چور اور ڈکیٹ نہیں ہوتے تھے اور نہ ہی عوام کا خون چوسنے والے گروہ موجود ہوتے تھے اس لئے زاتی مفاداتی گروہ کا مزید اقتدار میں رہنا ملکی استحکام کیلئے نقصان دہ ہو سکتی ہے۔

پی ٹی آئی کے پاس معاشی بدحالی سے نمٹنے کا پلان نہیں تھا

انہوں نے مزید کہا کہ لوگ چھت سے محروم اور نوجوان  بے روزگاری کے سونامی  میں ڈوب رہے ہیں اور اشیاء ضروریہ عوام الناس کی دسترس سے باہر ہو چکی ہیں عوام  فاقہ کشی پر مجبور ہیں لیکن اب حقیقی تبدیلی کا وقت آگیا ہے۔

نیر بخاری کا کہنا تھا کہ چیرمین بلاول بھٹو عالمی سطح پر ملک کے مثبت جمہوری تشخص کی پہچان ہیں اور بلاول بھٹو  نوجوانوں کی امید اور پاکستان کا مستقبل ہیں۔

یاد رہے کہ میڈیا سے گفتگو میں بلاول بھٹو زرداری نے کہا کہ 2018 سے ہی معیشت تباہی کی جانب بڑھ رہی تھی، ضروری نہیں کہ جو ٹیکس نیٹ میں نہیں وہ چور ڈاکو ہے۔

ان کا کہنا تھا کہ اس وقت عوام مہنگائی کے ہاتھوں پس رہے ہیں، حکومت کی غلط پالیسیوں سے ملکی معاشی صورتحال ابتر ہو رہی ہے۔

پی پی پی چیئرمین نے مزید کہا کہ حکومت کی نااہلی کا نقصان عوام اٹھا رہے ہیں، آج ہر طبقہ پریشان ہے، تعلیم اور علاج کا خرچہ اٹھانا مشکل ہوگیا، کنفیوژن معیشت کے لیے سب سے خطرناک عنصر ہے۔

انہوں نے یہ بھی کہا کہ 2018 میں معیشت تباہی کی جانب بڑھ رہی تھی، ن لیگ کے دور میں معیشت کی صورتحال ویسی نہیں تھی جیسی اسحاق ڈار صاحب پیش کرتے تھے۔

پی پی پی چیئرمین نے کہا کہ پچھلی اور موجودہ حکومت غریب عوام کے ریلیف کے لیے کوئی پروگرام نہیں لاسکی، سندھ کا بورڈ آف ریونیو صوبہ پنجاب اور وفاق سے اچھا کام کر رہا ہے، سندھ نے ایک سال کے سوا ہر بار اپنا ٹیکس ٹارگٹ حاصل کیا۔

انہوں نے مزید کہا کہ کس نے کہا تھا کہ ایک سال کے اندر اندر اکانومی کو ڈاکومنٹ کریں گے؟ پی ٹی آئی کے تمام تجربات کے باوجود ایکسپورٹ نہیں بڑھی۔