وفاقی حکومت کی جانب سے خواتین کو کفالت پروگرام کے ذریعے اسمارٹ فون دینے کا اعلان کردیا گیا ہے۔

معاون خصوصی ثانیہ نشتر نے ایک موقع پر بتایا کہ حکومت کی جانب سے کفالت پروگرام کے تحت خواتین کو آن لائن معاونت دی جارہی ہے جس کے تحت خواتین کو اسمارٹ فون بھی دیئے جائیں گے۔

تفصیلات کے مطابق معاون خصوصی ڈآکٹر ثانیہ نشتر نے گرلز ایجوکیشن پر تقریب سے خطاب کرتے ہوئے کہا حکومت خواتین کی سماجی ترقی کے ٹھوس اقدامات کر رہی ہے، صحت کے شعبہ میں بھی فاصلہ زیادہ ہے۔

ثانیہ نشتر کا کہنا تھا کہ حکومت نے پالیسی میکنگ کے لیے اعداد و شمار جمع کرنے کا پہلا کام کیا، احساس پروگرام میں خواتین کے لیے 50فیصد کوٹہ رکھا گیا ہے جس کے تحت 50 فیصد اسکالرشپ خواتین کو دی جائیں گی۔

معاون خصوصی نے کہا کہ وسیلہ تعلیم کےتحت پرائمری تعلیم میں خواتین کو برابر کا حصہ دیا ہے جبکہ کفالت پروگرام کے تحت خواتین کو آن لائن معاونت دی جا رہی ہےاور اب خواتین کو اسمارٹ فون بھی دیئے جائیں گے۔

ان کا کہنا تھا کہ خواتین سےجبری مشقت پر سندھ اور پنجاب کے ساتھ قانون سازی کررہے ہیں اور خاندانی منصوبہ بندی کے لیے ٹاسک فورس بنائی ہے، پاکستان میں ایک خاتون کے دس دس بچے ہوتے ہیں ، بچوں میں اضافہ معیشت اور خود خواتین کے لیے نقصان دہ ہے۔

ثانیہ نشتر نے مزید کہا کہ احساس پروگرام کےتحت نجی شعبےکوبھی ساتھ ملا رہے ہیں، پروگرام پر کورونا کا معاملہ ختم ہوتے ہی کام شروع کر دیا جائے گا۔