پاکستان میں موجود سعودی عرب کے شہریوں یا اقامہ ہولڈرز کا آخری گروپ سعودی عرب روانہ ہو گیا ہے۔

ذرائع کا کہنا ہے کہ سعودی سفارت خانے کی جانب سے اعلان شدہ 72 گھنٹوں کی مہلت مکمل ہونے پر سعودی شہریوں کا یہ گروپ واپس روانہ ہوا ہے۔

یاد رہے کہ کورونا وائرس کو عالمی ادارہ صحت کی جانب سے عالمی وبا قرار دیے جانے کے بعد مختلف ممالک پہلے سے اختیار کردہ احتیاطی تدابیر میں مزید تیزی لے کر آئے ہیں۔ اسی ضمن میں سعودی عرب کی حکومت نے سفری احتیاطی تدابیر کا اعلان کرتے ہوئے اقامہ رکھنے والے غیر ملکیوں کو ہدایت کی ہے کہ وہ 72 گھنٹوں میں واپس پہنچیں۔

سعودی عرب سے پاکستانیوں کی واپسی کیلئے حکومت سرگرم

سعودی حکومت کی ہدایات کے تحت وہ افراد جو سعودی شہری ہیں یا اقامہ ویزہ رکھتے ہیں، وہ افراد 72 گھنٹوں کے اندر سعودی عرب کا سفر کر سکتے ہیں اور یہ مدت اتوار 15 مارچ 2020 سہ پہر 3 بجے ختم ہو جائے گی۔

ذرائع کے مطابق پی آئی اے نے سعودی ایوی ایشن سے 25 مارچ تک کی توسیع کی درخواست کی تھی، سعودی حکام نے صرف سعودی ایئر لائن کو 21 مارچ تک پاکستان سے پروازوں کی اجازت دی تھی۔

ترجمان سول ایوی ایشن کے مطابق پی آئی اے کے کنٹری مینیجر سعودی حکام سے اجازت کے لیے مسلسل رابطے میں ہیں۔