چینی سفیر یاؤ جنگ نے کہا ہے کہ چین اور پاکستان آئرن برادر ہیں اور وبائی چیلنج سے نمٹنے کیلئے چین پاکستان کے ساتھ شانہ بشانہ کھڑا ہے۔

تفصیلات کے مطابق پاکستان میں تعینات چینی سفیر یاؤ جنگ کی وزارت خارجہ میں وزیر خارجہ مخدوم شاہ محمود قریشی سے ملاقات ہوئی ، جس میں کورونا وبا سے پیدا ہونے والی صورتحال پر تبادلہ ء خیال کیا گیا ۔

اس موقع پر وزیر خارجہ نے کرونا چیلنج سے احسن انداز میں نمٹنے اور اس عفریت پر غلبہ حاصل کرنے پر چین کی حکومت اور عوام کو مبارکباد دی اور اس  مشکل وقت میں پاکستان کی مدد کرنے پر چین کا شکریہ ادا کیا۔

ہمارے لیے سب سے زیادہ خوش آئند بات یہ ہے کہ آج چین میں زندگی معمول کی طرف لوٹ رہی ہے ادارے اپنا کام کرتے نظر آ رہے ہیں ٹرانسپورٹ، کا پہیہ حرکت میں آ چکا ہے اور آج پوری دنیا اس وبا سے نبرد آزما ہونے کیلئے چین کے ماڈل کی پیروی کرتی دکھائی دے رہی ہے ۔

کورونا وائرس کے حوالے سے پاکستان چین کے تجربات سے استفادہ حاصل کر رہا ہے جبکہ چین سے فراہم کردہ آلات، اس وبا سے نمٹنے کیلئے، پاکستان کی استعداد کار میں اضافہ کریں گے۔

کورونا وائرس سے اموات کی تعداد 88 ہزار سے تجاوز کرگئیں

ملاقات میں چینی سفیر یاؤ جنگ نے کہا کہ چین اور پاکستان آئرن برادر ہیں اور اس مشکل وقت میں چین پاکستان کے ساتھ شانہ بشانہ کھڑا ہے اور چین، اس وبائی چیلنج سے نمٹنے کیلئے پاکستان کی معاونت بدستور جاری رکھے گا۔

واضح رہے کہ دنیا بھر میں اب تک کورونا وائرس سے ہونے والی اموات  کی تعداد 88 ہزار سے تجاوز کرگئیں ہیں۔

 کورونا وائرس کی عالمی وباء دنیا کے 200 سے زائد ممالک میں پھیل چکی ہے جس میں 88،565افراد ہلاک جبکہ 15لاکھ 21ہزار  سے زائد افراد متاثر ہیں۔