وزیر تعلیم سندھ سعید غنی نے کہا کہ ہمارے ڈاکٹرز اس وبا سے عوام کو بچانے کے لئے اپنی جان کی پرواہ نہ کرتے ہوئے کام کررہے ہیں، ہم ایسا کوئی رسک نہیں‌ لیں گے جس سے اس وائرس کا پھیلاؤ ہو۔

تفصیلات کے مطابق وزیر تعلیم سندھ سعید غنی سے کراچی ٹرانسپورٹ اتحاد کے صدر ارشاد بخاری کی قیادت میں انٹرا سٹی اور سندھ بس اونرز ایسوسی ایشن کے عہدیداران کی ملاقات ہوئی جس میں صوبائی وزیر نے ٹرانسپورٹرز کے مسائل سنیں اور موجودہ صورتحال کے حوالے سے تبادلہ خیال کیا۔

وزیر تعلیم سندھ نے کہا کہ سندھ حکومت نے کرونا وائرس سے عوام کو بچانے کے لئے سب سے پہلے احتیاطی اقدامات شروع کئے تاکہ زیادہ سے زیادہ لوگوں کو اس وبا سے محفوظ رکھا جاسکے، اب تک جن سیکٹرز کو اجازت دی گئی ہے اس کے لیے نہ صرف سخت ایس او پیز بنائی گئی ہیں بلکہ اس کی جامع مانیٹرنگ بھی کی جارہی ہے۔

اس موقع پر صدر کراچی ٹرانسپورٹ اتحاد ارشاد بخاری نے کہا کہ حکومت کے تمام اقدامات کی حمایت کرتے ہیں، آج ڈیڑھ ماہ سے زائد کا عرصہ گزر گیا ہے اور ہماری ٹرانسپورٹ ہم نے حکومت کے اعلان پر بند رکھی ہیں، ہم سمجھتے ہیں کہ سندھ حکومت یہ سب عوام کے مفاد میں کررہی ہے لیکن اب ہمارے ڈرائیورز اور کلینئرز سڑکوں پر بے آسرا ہوکر پڑے ہیں۔

حکومت نے کاروبار کھولنے کی اجازت نہیں دی ، سعید غنی

ارشاد بخاری نے  یہ بھی کہ اندرون سندھ ٹرانسپورٹ چلانے کے لیے ایس او پیز دی جائیں ہم اس پر مکمل عملدرآمد کی یقین دہانی کراتے ہیں، حکومت اگر فوری طور پر ٹرانسپورٹ نہیں کھول سکتی تو ڈرائیوروں، کلئنرز اور مالکان کے لئے ریلیف پیکج کا اعلان کرے، ہم پر اس وقت اپنے ٹرانسپورٹروں اور ہمارے پاس کام کرنے والے ملازمین کا بھاری دباؤ ہے۔

صدر کراچی ٹرانسپورٹ اتحاد ارشاد بخاری نے مزید کہا کہ ہم سندھ حکومت کی نیت پر شک نہیں کرتے کیونکہ سندھ حکومت ہی واحد حکومت ہے جس نے سب سے پہلے کرونا وائرس سے بچاؤ کے لیے اقدامات کیے، ہماری یہ استدعا ہے کہ ہمارے مسائل کو ترجیعی بنیادوں پر حل کیا جائے اور ایس او پیز دے کر انٹر سٹی اور اندرون سندھ ٹرانسپورٹ شروع کی جائے۔

ملاقات میں حاجی امان اللہ خان نیازی، حاجی مراد خان درانی، حاجی عبدالرؤف خان نیازی، محمد عاشق، تواب خان، فقیر محمد اور دیگر شامل تھے۔