وفاقی حکومت نے ملک میں کورونا وائرس کا پھیلاؤ روکنے کےلئے لاک ڈاؤن کی مدت میں توسیع کا فیصلہ کرلیا ہے۔

تفصیلات کے مطابق وفاقی وزیر منصوبہ اسد عمر نے وزیراعظم کے معاون خصوصی ڈاکٹر ظفر مرزا اور معید یوسف کے ہمراہ پریس بریفنگ میں کہا کہ وفاق نے تمام صوبوں کی مشاورت سے فیصلہ کیا ہے کہ ملک میں لاک ڈاؤن کی بندشیں 14 اپریل تک جاری رہیں گی اور تمام صوبے اس فیصلے پرعملدرآمد کریں گے ۔

اسد عمر نے کہا کہ آج مشترکہ طور پر فیصلہ ہوا ہے کہ گڈز ٹرانسپورٹ پر کوئی بندش نہیں ہوگی کیونکہ کھانے پینے کی اشیا اور ادویات کی دکانیں کھلی رکھنا بہت ضروری ہے جبکہ آگے کے حوالے سے فیصلہ 14 اپریل کی این سی سی میٹنگ میں یہ بھی طے پائے گا کہ بندشیں کم کی جائیں یا بڑھائی جائیں۔

اپنے بیان میں وفاقی وزیر منصوبہ نے یہ بھی کہا کہ صوبوں کے وفاق سے جتنے مؤثر روابط ہونگے اتنے بہتر طریقے سے ہم مدد کر پائیں گے۔

 اسد عمر کا کہنا تھا کہ ماضی میں بیرون ملک سے آنےوالوں کی وجہ سے کورونا پھیلاہے، اندرون ملک پروازوں پر بندش جاری رہے گی، بندشوں کی وجہ سے کوروناوائرس کے پھیلاؤ میں کمی ہوئی ہے جبکہ مزید بندشوں کی ضرورت ابھی محسوس نہیں کی گئی۔

سندھ حکومت کا لاک ڈاؤن کی مدت میں توسیع کا فیصلہ

اسد عمر کایہ بھی کہنا تھا کہ چار اپریل کو ایک پرواز جائے گی اور اسی دن ایک پرواز بیرون ملک سے اسلام آباد آئے گی، تمام پروازیں ایک ساتھ بحال نہیں کی جائیں گی جبکہ اسلام آباد آنے والی پرواز کے تمام مسافروں کو ایئرپورٹ پر قرنطینہ میں رکھا جائے گا اور ان کے ٹیسٹ لیے جائیں گے، منفی آنے پر انہیں جانے دیا جائے گا۔

وفاقی وزیر منصوبہ اسد عمر کا مزید کہنا تھا کہ شکایات آئی ہیں کہ کچھ پبلک پرائیویٹ سیکٹر کے دفاتر بائیو میٹرک مشین سے حاضری لگا رہے ہیں، ہم صرف یہ کہہ رہے ہیں جو پابندیاں ہیں ان پر عمل کریں تو صورتحال بہتر ہوسکتی ہے۔

واضح رہے کہ ملک میں کورونا وائرس کے آج 105 افراد میں مہلک وائرس کی تشخیص ہوئی جن میں سندھ سے 33  ،بلوچستان میں 6، خیبرپختونخوا میں23، پنجاب میں 40 اور گلگت بلتستان میں 3 کورونا وائرس کے کیسز کی تصدیق ہوئی ہے جس کے بعد ملک بھر میں متاثرہ افراد کی تعداد 2148 تک پہنچ گئی ہے۔

پاکستان میں کوروناوائرس سے متاثرہ مریضوں کی اعداد و شمار کے مطابق اس وقت سندھ میں 709 ، بلوچستان میں 164 ، خیبرپختونخوا میں 276 ،اسلام آباد میں 58  ، گلگت بلتستان میں 187  ، پنجاب میں 748 اور آزاد کشمیر میں 6  مریض موجود ہے۔