شہریار آفریدی کو دوبارہ وزیر مملکت برائے انسداد منشیات تعینات کردیا گیا۔

تفصیلات کے مطابق  وزیر مملکت برائے سیفران شہریار آفریدی کو وزیر مملکت برائے انسداد منشیات کا اضافی قلمدان واپس دے دیا گیا ہے۔

یاد رہے کہ موجودہ وزیر مملکت برائے سیفران   شہریارآفریدی سے وزیر اعظم عمران خان نے 8 اپریل کو   انسداد منشیات کا اضافی قلمدان واپس لے لیا تھا۔

تاہم آج وزیراعظم نے ایک بار پھر یوٹرن لیتے ہوئے انہیں انسداد منشیات کا قلمدان واپس دے دیا ہے۔

واضح رہے کہ چند روز  قبل چینی اور آٹا بحران کی رپورٹ شایع ہونے کے بعد وفاقی کابینہ میں اہم تبدیلیاں دیکھنے میں آئی تھیں  جس میں کئی وزرا کے قلمدان تبدیل کردیے گئے تھے۔

ان تبدیلیوں میں وفاقی وزیر برائے پارلیمانی امور اعظم سواتی کا قلمدان تبدیل کر کے انہیں وفاقی وزیر برائے انسدادِ منشیات کا عہدہ تفویض کردیا گیا تھا۔