وزیرخارجہ شاہ محمود قریشی نے کہا ہے کہ ہندوستان ایک خطرناک کھیل رہا ہے عالمی برادری ہندوستان کے غیر ذمہ دارانہ رویے کا نوٹس لے۔

تفصیلات کے مطابق اپنے ایک بیان میں وزیر خارجہ شاہ محمود قریشی نے بھارت کی جانب سے مسلسل لاین آف کنٹرول کی خلاف ورزیوں پر کہا ہے کہ ایک طرف دنیا کورونا جیسی عالمی وبا کے پھیلاؤ کو روکنے کیلئے نبرد آزما ہے تو دوسری طرف بھارت کی جانب سے ایل او سی کی خلاف ورزیوں کا سلسلہ مسلسل جاری ہے۔

وزیر خارجہ نے کہا کہ بھارت کی جانب سے کورونا وباء کے باوجود ایل او سی کی مسلسل خلاف ورزیوں پر صدر سلامتی کونسل کو میں نے خط لکھا ہے اور پاکستان کی طرف سے تحفظات کا اظہار کیا ہے گزشتہ روز برطانوی ہائی کمشنر سے ملاقات میں درخواست کی کہ برطانیہ پی 5 کا اہم رکن ہونے کے ناطے ہندوستان کے غیر ذمہ دارانہ رویے کا نوٹس لے۔

 شاہ محمود قریشی نے یہ بھی کہا کہ بھارت جس طرح مسلمانوں کے خلاف نفرت انگیز رویہ اختیار کیے ہوئے ہے اور جس طرح مسلمانوں کو کرونا وائرس کا ذمہ دار قرار دے رہا ہے وہ انتہائی افسوسناک ہے جس کی جتنی مذمت کی جائے کم ہے۔

وزیر خارجہ شاہ محمود قریشی نے مزید کہا کہ ہندوستان ایک خطرناک کھیل رہا ہے عالمی برادری کو ہندوستان کے منافرت پر مبنی اس رویے کی سرزنش کرنی چاہیے۔

واضح رہے اس سے قبل ناروے کی وزیرخارجہ سے ٹیلیفونک رابطے کے دوران وزیر خارجہ نے نارویجین ہم منصب کو بتایا کہ وزیر اعظم عمران خان نے اس عالمی وبا کے باعث احساس پروگرام کے تحت 8 بلین ڈالر ریلیف پیکج کا آغاز کیا ہے۔

وزیر خارجہ کا برطانیہ میں ہونیوالے جانی نقصان پر گہرے دکھ کا اظہار

شاہ محمود قریشی نے مقبوضہ جموں و کشمیر میں بھارتی کرفیو سے متعلق ناروے کی ہم منصب کو آگاہ کرتے ہوئے بتایا مقبوضہ کشمیر میں مستقل کرفیو کے باعث خوراک اور ادویات کی شدید کمی ہو چکی ہے۔

وزیر خارجہ شاہ محمود قریشی نے مزید کہا کہ موجودہ عالمی وبائی تناظر میں عالمی برادری کو انسانی ہمدردی کے ناطے، اس بلاجواز کرفیو کے خاتمے کیلئے بھارت پر دباؤ بڑھانا ہو گا۔