وزیر اعلیٰ سندھ سید مراد علی شاہ نے صوبے کی موجودہ صورتحال کو تشویشناک قرار دے دیا ہے۔

سماجی رابطے کی ویب سائٹ ٹوئیٹر پر جاری ویڈیو پیغام میں وزیر اعلیٰ سندھ مرادعلی شاہ نے کہا کہ  یہ بات انتہائی تشویش ناک ہے کہ آج کورونا کے  سب سے زیادہ کیسز  سامنے آئے ہیں ۔

وزیراعلیٰ سندھ نے بتایا کہ  گذشتہ 24 گھنٹوں میں 104 کورونا کے کیسز آئے ہیں  جومجموعی  ٹیسٹ کا 20 فیصد ہیں ۔یہ دنیا کی سب سے زیادہ  اوسط ہے جو کہ تشویش کا باعث ہے ۔

مراد علی شاہ کا کہنا تھا کہ گذشتہ 24 گھنٹوں میں 531 ٹیسٹ کیے گئے جس میں 104 یعنی 20 فیصد مثبت آئے  جبکہ اسی عرصے کے دوران 6 اموات  بھی ہوئی ہیں  جوکہ زیادہ ہیں ۔

Advertisement

Sindh CM Syed Murad Ali Shah says 20% Coronavirus cases have increased …… pic.twitter.com/ZBiek95f9O

— CMHouseSindh (@SindhCMHouse) April 11, 2020

انہوں نے کہا کہ اس اعداد و شمار سے ظاہر ہوتا ہے کہ صورتحال  خراب ہورہی ہے ۔صورتحال  خراب ہونے کی وجہ لاک ڈاؤن پر سختی سے عمل نہ ہونا ہے ۔

وزیر اعلیٰ سندھ نے کہا کہ لاک ڈاؤن پر  جب تک سختی سے عمل ہورہا تھاتو صورتحال بہتر تھی ۔ملیر میں لاک ڈاؤن کافی کمزور تھا جس کو میں نے آج مزید سخت کرنے کی ہدایت دی ہے ۔

مراد علی شاہ نے مزید کہ کہا کہ  حیدرآباد  میں  بھی کیسز کی تعداد بڑھ رہی ہے  جس کی وجہ سے لاک ڈاؤن سخت کیا جارہاہے۔

انہوں نے کہا کہ 371 لوگ صحت یاب ہوکر اپنے گھروں کوچلے گئے ہیں  جبکہ آج مزید 13 لوگ صحت یاب ہوکر اپنے گھروں کو جارہے ہیں ۔