وزیر خارجہ شاہ محمود قریشی نے بحرین کے ہم منصب شیخ ڈاکٹر عبداللطیف الزیانی سے ٹیلیفونک رابطہ کیا جس میں دونوں وزرائے خارجہ کا کووڈ 19 سمیت اہم علاقائی امور پر باہمی مشاورت کا سلسلہ جاری رکھنے پر اتفاق کیا گیا۔

ٹیلیفونک رابطے کے دوران کورونا عالمی وبائی صورتحال اور اس سے نبرد آزما ہونے کیلئے مشترکہ حکمت عملی کے حوالے سے تفصیلی تبادلہءخیال کیا گیا۔

اس موقع پر وزیر خارجہ نے بحرین کے ہم منصب کو رمضان المبارک کی مبارک باد دی اور بحرین میں مقیم، وطن واپسی کے منتظر پاکستانیوں کی معاونت اور بحرین کی جیلوں میں مقید پاکستانی قیدیوں کی رہائی اور وطن واپسی میں مدد فراہم کرنے پر، اپنے بحرینی ہم منصب کا شکریہ ادا کیا۔

بحرین کے وزیر خارجہ سے رابطے میں شاہ محمود قریشی نے کورونا وائرس کے پھیلاؤ کو روکنے کیلئے سلطنت بحرین کی طرف سے اٹھائے گئے بروقت اقدامات کو سراہتے ہوئے اس وبا سے نمٹنے کیلئے پاکستان کیطرف سے اب تک کی جانے والی کوششوں سے اپنے بحرینی وزیر خارجہ کو آگاہ کیا اور بحرین کی تعمیر و ترقی میں پاکستانی کمیونٹی کی گرانقدر خدمات کی تعریف کی ۔

عالمی برادری ہندوستان کے غیر ذمہ دارانہ رویے کا نوٹس لے، وزیرخارجہ

وزیر خارجہ نے بحرین کے وزیر خارجہ کو موجودہ وبائی صورتحال ،کے پیش نظر ترقی پذیر ممالک کو معاشی بحران سے نکالنے اور کمزور معیشتوں کو سہارا دینے کیلئے، وزیر اعظم عمران خان کی طرف سے “گلوبل ڈیٹ ریلیف” کی تجویز کے خدوخال اور تفصیلات سے آگاہ کیا۔-

بحرینی وزیر خارجہ نے وزیر اعظم عمران خان کے گلوبل ڈیٹ ریلیف مطالبے کو سراہتے ہوئے اس ضمن میں اپنے ممکنہ تعاون کا یقین دلایا۔

 اس موقع پر شاہ محمود قریشی نے بحرینی وزیر خارجہ کو بھارت کی جانب سے پے در پے، لاین آف کنٹرول کی خلاف ورزیوں کے حوالے سے بھی آگاہ کیا اور کہا کہ مقبوضہ جموں و کشمیر میں جاری مسلسل بھارتی کرفیو  نے 80 لاکھ کشمیریوں کی زندگیوں کو اجیرن کر دیا ہے۔