سرگودھا کے علاقوں ساہیوال اور میانی میں پولیس نے منشیات فروشوں کیخلاف بڑی کارروائی کرتے ہوئے 90 کلو گرام چرس، 39 کلوگرام افیون، 21 کلوگرام ہیروئن برآمد کر کے 4 ملزمان کو گرفتار کر لیا، ملزمان سے برآمد کی گئی منشیات کی مالیت کروڑوں روپے ہے۔

 میانی پولیس نے ایس ایچ او سہیل ساہی کی سربراہی میں کارروائی کرتے ہوئے پشاور سے سرگودھا آنے والے منشیات فروش کو گرفتار کر کے اس کے قبضہ سے 21 کلو ہیروئن ۔ 36 کلو افیون اور 15 کلو چرس برآمد کر لی ۔

ساہیوال پولیس نے ڈیرہ ازان پر مخبر کی اطلاع پر چھاپہ مار کر 2 ملزمان عبدالواجد اور عبدالواحد کو گرفتار کر کے ان کے قبضہ سے 75 کلو چرس اور 3 کلو افیون برآمد کر لی ۔ پولیس نے منشیات فروشوں کے سہولت کار رانا شوکت کو بھی گرفتار کر لیا۔

پولیس کے مطابق ملزمان منشیات سرگودھا کے مختلف علاقوں میں فروخت کیلئے بھیجنا چاہتے تھے۔ گرفتار ملزمان میں 3 کا تعلق سرگودھا جبکہ ایک کا تعلق پشاور سے ہے۔

ساہیوال اور میانی پولیس نے ملزمان کیخلاف مقدمہ درج کر کے تفتیش شروع کر دی پولیس کے مطابق ملزمان کے دیگر ساتھیوں کی گرفتاری کیلئے چھاپے مارے جا رہے ہیں۔